Бас прокуратура Ақтөбеде табиғатты ластағаны үшін кәсіпорынға 2,9 млрд теңге айыппұл салынғанын мәлімдеді, деп хабарлайды alataunews.kz.
Ақтөбе облысының табиғат қорғау прокурорлары «Восход Хром» ЖШС-ның Хромтау ауданында хром кенін өңдеу барысында заң бұзушылықтар анықтады.
Кәсіпорын 2022 жылы экологиялық рұқсатсыз жұмыс істегені белгілі болды. Осы кезеңде атмосфераға 52 тоннадан астам ластаушы заттар (бейорганикалық шаң, үш валентті хром, магний оксиді және т.б.) шығарылып, 395 мың тонна ірі кесек пен шламды байыту қалдықтары заңсыз орналастырылғаны анықталды.
Прокуратураның араласуымен кәсіпорынға экологиялық рұқсатсыз қызметі үшін 2,9 млрд теңгеден астам айыппұл салынды. Серіктестік бұл шешімге қарсы сотқа шағымданғанымен, облыстық соттың бірінші және апелляциялық инстанциялары айыппұлды заңды деп таныды.
