Кездесуде тұрғындар саяжай аумақтарында көпқабатты және орта қабатты тұрғын үйлер салуға қарсы екендерін жеткізді. Олардың басты талабы қазіргі жеке тұрғын үйлерді сақтап, аумақты жеке тұрғын үй құрылысына арналған аймақ ретінде дамыту. Сонымен қатар тұрғындар жер учаскелерінің нысаналы мақсатын жеке тұрғын үй құрылысына ауыстыру, орталықтандырылған ауыз сумен және табиғи газбен қамтамасыз ету, жол инфрақұрылымын жақсарту мәселелерін көтерді.
Жиында қаланың бас жоспарын әзірлеген «Урбостиль» ЖШС бас директоры Любовь Нысанбаева саяжай аумақтарын жаппай сүру қарастырылмағанын мәлімдеді.
Оның айтуынша, бас жоспар – қаланың ұзақ мерзімді даму бағытын айқындайтын стратегиялық құжат. Онда тұрғын үй құрылысы, өнеркәсіптік және әлеуметтік нысандарды орналастыру, инженерлік-коммуникациялық желілер мен көлік инфрақұрылымын дамыту мәселелері қамтылады. Дегенмен жеке меншіктегі жер учаскелеріне қатысты кез келген шешім қолданыстағы заңнама талаптарына сәйкес қабылдануға тиіс.
Алматы облысының сәулет және қала құрылысы басқармасының бөлім басшысы Руслан Алтыбаев саяжай аумақтарындағы құрылыс түрлері мен ғимараттардың қабаттылығы егжей-тегжейлі жоспарлау жобасы әзірленген кезде нақтыланатынын түсіндірді.
Оның сөзінше, қазіргі уақытта аумақтардың функционалдық аймақтарын өзгеріссіз қалдыру көзделіп отыр. Алайда нақты құрылыс параметрлері тиісті жоспарлау құжаттары дайындалғаннан кейін белгілі болады.
Егжей-тегжейлі жоспарлау жобасын әзірлеу 2027 жылға қалдырылуы мүмкін. Себебі жобаны қаржыландыру үшін бюджеттік өтінім беру қажет. Тапсырыс беруші ретінде Алматы облысының сәулет және қала құрылысы басқармасы немесе Қонаев қаласының тиісті құрылымдық бөлімшесі қарастырылып жатыр.
Қала әкімі Асхат Бердіханов тұрғындардың ұсыныстары назардан тыс қалмайтынын айтып, егжей-тегжейлі жоспарлау жобасы әзірленген кезде міндетті түрде қоғамдық тыңдау ұйымдастырылатынын жеткізді.
«Бұған дейін әзірленген инженерлік желілерді тарту жобалары өзгертілмейді. Ауыз су және газ тарту жобалары биыл мемлекеттік сараптамадан өтеді. Кейін жол және басқа да инфрақұрылымды дамыту мәселелерін қарастырамыз», – деді қала әкімі.
Осылайша, Қонаевтағы саяжай аумақтарын жаппай бұзу жоспарда жоқ. Дегенмен жер учаскелерінің мәртебесі, құрылысқа қойылатын талаптар және аумақтарды дамытуға қатысты түпкілікті шешімдер егжей-тегжейлі жоспарлау жобасы аясында нақтыланбақ.
