Сыбайлас жемқорлыққа қарсы қызмет қазақстандықтарға алаяқтардың «Халық заңгері» республикалық акциясының атын пайдаланып, жалған ақпарат таратып жүргені туралы ескерту жасады, деп хабарлайды alataunews.kz.
Алаяқтар интернетте жасанды интеллектпен жасалған жалған бейнероликтер таратып, азаматтарды шатастыруға тырысуда. Бұл материалдар мессенджерлер мен әлеуметтік желілер арқылы таратылып, адамдарды ақылы адвокаттық қызметтерге сілтеме арқылы өтуге және жеке мәліметтерін беруге үгіттеуде.
Сыбайлас жемқорлыққа қарсы қызмет «Халық заңгері» акциясы аясында барлық заңгерлік кеңес тегін берілетінін және акцияның тек офлайн форматта өткізілетінін еске салды.
Ведомство халықты жалған ақпаратқа сенбеуге, күмәнді сілтемелерге өтпеуге және қаражат аудармауға шақырады. Мұндай әрекеттерге тап болған жағдайда құқық қорғау органдарына дереу хабарлау керектігін ескертті.
