Кездесу барысында облыстық басқарма басшылары «ЕЦП» платформасына қосылу үдерісіне қатысты өз ұсыныс-пікірлерін білдіріп, жүйені өңірлік деңгейде тиімді іске асыру тетіктерін ортаға салды.
Фарида Сағындыққызы өз сөзінде аталған платформаны енгізу Мемлекет басшысы мен Премьер-министрдің тікелей тапсырмасымен жүзеге асып жатқанын атап өтті.
«ЕЦП» платформасына көшу арқылы білім беру, денсаулық сақтау, спорт, мәдениет және әлеуметтік саладағы барлық мемлекеттік қолдау шаралары ашық әрі тиімді бақылауға алынады. Платформаға өту үшін ұйымдар бизнес-процестерін жүйелеп, штаттық кестелерін бекітіп, қызмет алушылар туралы нақты деректерді енгізуі, сондай-ақ материалдық-техникалық базасын көрсетуі қажет. Осы талаптар толық орындалған жағдайда ашық әрі тиімді басқару жүйесі қалыптасады», – деді министр кеңесшісі.
Қазіргі уақытта Талғар ауданында және Қаскелең қаласында бірқатар ұйым «ЕЦП» платформасына көшу жұмыстарын пилоттық режимде бастап кетті.
Ресми деректерге сәйкес, бүгінде Алматы облысы бойынша 596 ұйым платформаға тіркеліп, бес саланы қамтып отыр. Олардың басым бөлігі білім беру ұйымдарына тиесілі. Атап айтқанда, мектептер, арнайы білім беру ұйымдары, мектеп-интернаттар мен реабилитациялық орталықтар жүйеге қосылған.
Сонымен қатар, 119 ұйым штаттық кестелерін толық енгізіп, келісімшарттарын тіркеп, кадрлық тағайындау жұмыстарын аяқтаған. Алдағы кезеңде бұл ұйымдар толықтай бірыңғай цифрлық платформаға көшіріледі.
