Президент өз құттықтауында Наурыздың тазару мен жаңару кезеңі екенін атап өтіп, тазалық ұғымының ауқымы кең екеніне назар аударды. Оның айтуынша, бұл ең алдымен ойдың, сананың және ниеттің тазалығын білдіреді.
Мемлекет басшысы осыдан екі жыл бұрын елде басталған «Таза Қазақстан» жалпыұлттық акциясына да тоқталды. Президенттің сөзінше, бұл жоба халықтың, әсіресе жастардың кең қолдауына ие болды. Азаматтар тазалықты сөз жүзінде ғана емес, нақты іспен дәлелдеп келеді.
Сондай-ақ Қасым-Жомарт Тоқаев ұқыптылық, жинақылық және тиянақтылық секілді қасиеттер ұлттың жаңа сапасына айналып келе жатқанын айтты. Оның пікірінше, «Таза Қазақстан» бастамасы жай ғана науқан емес, мемлекет идеологиясының маңызды бөлігіне айналуға тиіс.
Президент бұл игі іс бір мерекемен немесе белгілі бір кезеңмен шектелмей, жыл бойы жалғасуы керектігін жеткізді. Әсіресе, Ұлыстың ұлы күні тазалық философиясын кеңінен дәріптеудің маңызы зор екенін атап өтті.
Құттықтауында Мемлекет басшысы Наурыз мейрамы табиғат пен ел өміріндегі жаңарудың символы екенін айтып, осындай тарихи сәтте айтылған ақ тілектің мәні ерекше екенін жеткізді.
Сөз соңында Президент елге амандық, жерге тыныштық тілеп, Қазақстанның мәңгі жасай беруіне ниет білдірді.
«Қасиетті Отанымыз – Қазақстан Республикасы мәңгі жасасын!
Ата заңымыз өз тұғырынан түспесін!
Туымыз биікте желбіресін!
Ұлыс оң болсын, ақ мол болсын!
Еліміздің төрт құбыласы түгел болсын!» – деді Мемлекет басшысы.
