Бұдан бөлек, бірнеше көкпар командалары өзара мықтыларды анықтады. Бәйге арасында жамбы ату, қыз қуу, теңге ілу сияқты ұлттық ойындар ойнатылып, рухани құндылықтарымыз дәріптелді.
Айта кету керек облыс орталығында Жеңіс күнінде және басқа да мерекелер аясында ат спорты жарыстары жиі ұйымдастырылып тұрады. Бәйгені тамашалауға келетін халықтың да саны артып келеді. Бабалар ерлігін насихаттап, ұлттық өнердің өрісін кеңейтуге бағытталған мұндай ауқымды жарыстар дәстүрге айналған.
Жеңіс күніне орай ұлттық ат спорты түрлерінен ұйымдастырылған жарыс «Талдықорған» ипподромында өтті. Аламан бәйге, топ бәйге, құнан бәйге, жорға жарыс сияқты жарыстарға 100-ден астам қатысушы ниет білдірген. Жарыстардың жалпы жүлде қоры – 18 млн теңге.
