Жаңадан салынға 30 тұрғын үйдің кілті кезекте тұрған көп балалы отбасылар, жетім балалар, бюджеттік қызметкерлер және 1-2 топтағы мүгедек жандар және жалғыз басты аналарға табыс етілді, деп хабарлайды alataunews.kz.
“Осылай халыққа қолдау көрсетіп жатқан мемлекет басшысына және қаражат бөліп жатқан облыс әкіміне алғыс білдіреміз. Бүгін жалпы саны 71-ші үйдің кілті табысталып жатыр. Бұл жоба ары қарай да жалғасын тапқанын қалаймыз”,- деді Кеген ауданының әкімі Нұрбақыт Теңізбаев.
Баспаналы болған көпбалалы аналардың бірі Эльмира Нұртаева да өз алғысын жаудырды.
«Бүгін облыс әкімінің, аудан әкімінің арқасында, міне, баспаналы болдық. Өте қуаныштымыз. Қуанышымызды сіздермен бөлісіп жатырмыз. Осы отыз үйдің тұрғындары, үйлеріңізде тек қуаныш, шаттық болсын. Келесі жылы да жастарға осындай баспаналар бұйыра берсін. Аудан әкімдігіне көп-көп рақмет. Тойымыз тойға жалғаса берсін», — дейді көпбалалы ана.
Айта кетейік, аудан бойынша барлығы 459 аудан тұрғыны үй кезегінде тұр. Оның ішінде әлеуметтік жағдайы төмен отбасылар – 163, жетім балалар және ата-ананың қамқорлығынсыз қалған балалар – 32, көп балалы отбасылар – 123, апатты жағдайдағы үйлер – 6, мемлекеттік және бюджеттік қызметкерлер – 135.
