Оқиға Свердлов облысында болған. Реж орталық аудандық ауруханасының дәрігерлері баланы аман алып қалды.
«Бірнеше түн бойы бала ұйықтай алмады, содан кейін қатты бас ауыра бастады, беті қисайып, денесінің жартысы ұйып қалды. Дәрігерлер баланың инсультке дейінгі жағдайда екенін анықтады. Науқас бір күн бұрын екі банка энергетикалық сусын ішкенін айтты», — делінген Свердлов облысының Денсаулық сақтау министрлігінің ресми Telegram-каналында жарияланған хабарламасында.
Дәрігерлердің мәліметінше, қазір бала үйіне оралған.
Реж Орталық аудандық аурухананың кардиологы Олеся Кучина энергетикалық сусындардағы кофеин қан қысымының жоғарылауын тудыратынын, миокард ишемиясы мен жүрек жеткіліксіздігінің қаупін арттыратынын атап өтті.
«Жүрек ритмінің бұзылуы ықтималдығы жоғары, бұл өмірге қауіп төндіруі мүмкін. Мен балалар мен жасөспірімдерге энергетикалық сусын тұтынуға болмайтынын ескертемін», — деді ол.
Айта кетейік, осы жазда Қазақстанда жасөспірімдерге энергетикалық сусындарды сатуға тыйым салу туралы шешім қабылданды. Тиісті заңға шілде айының басында Президент Қасым-Жомарт Тоқаев қол қойды. Сонымен қатар, заң өскелең ұрпақтың денсаулығын қорғау мақсатында 21 жасқа дейінгі адамдарға энергетикалық сусындарды сатуға тыйым салуды көздейді. Ол алғашқы ресми жарияланған күнінен кейін 60 (алпыс) күнтізбелік күн өткен соң күшіне енеді.
