Decentrathon 6.0 – қатысушыларға теориялық білімін тәжірибеде қолдануға, нақты бизнес-мәселелерді шешуге және инновациялық жобаларын ұсынуға мүмкіндік беретін технологиялық алаң.
Ұйымдастырушылардың мәліметінше, хакатон дәстүрлі бағдарламалау жарысынан әлдеқайда кең форматта өтеді. Қатысушылар жетекші компаниялар ұсынған нақты бизнес-кейстермен жұмыс істеп, нарықтағы өзекті мәселелерге технологиялық шешімдер әзірлейді.
Жарыс барысында командаларға IT-индустрияның тәжірибелі мамандары мен сарапшылары қолдау көрсетеді. Менторлар қатысушыларға кәсіби кеңес беріп, жобаларын жетілдіруге көмектеседі.
Хакатон жас мамандар үшін жаңа мүмкіндіктерге жол ашады. Қатысушылар технологиялық компаниялардың өкілдерімен, стартап негізін қалаушылармен және әлеуетті серіктестермен танысып, кәсіби байланыстарын кеңейте алады. Сонымен қатар үздік жобалар жұмыс берушілердің назарын аударуы мүмкін.
Бес маусымда 17 мыңнан астам IT-маман бас қосты
Decentrathon жобасына қызығушылық жыл сайын артып келеді. Ұйымдастырушылардың дерегінше, өткен маусымда Қазақстанның 20 қаласынан 5 500-ден астам адам қатысқан. Жарыстың жүлде қоры 12,5 миллион теңге және 20 мың АҚШ долларын құраған.
Ал бес маусым ішінде хакатон 17 мыңнан астам IT-маманның басын біріктірді.
Биылғы қорытынды маусым да еліміздің әр өңіріндегі технологияға қызығатын азаматтарды бір алаңға жинауды көздейді.
Хакатонға кімдер қатыса алады?
Decentrathon 6.0 жарысына қатысу үшін кәсіби бағдарламашы болу міндетті емес. Ұйымдастырушылардың айтуынша, хакатонға тәжірибесіне, жасына және тұрғылықты өңіріне қарамастан, технология саласына қызығатын кез келген адам қатыса алады.
Мектеп оқушыларына да мүмкіндік берілген. Алайда олар команда құрамында болуы керек және команда капитанының жасы 18-ден асуы тиіс.
Жарысқа қатысушылар бағдарламалау, дизайн, деректерді талдау және басқа да цифрлық бағыттар бойынша өз қабілеттерін көрсете алады.
Ұйымдастырушылар қатысушылардың жайлылығын да назардан тыс қалдырмаған. Хакатон барысында арнайы демалыс аймақтары, сусындар мен пицца ұсынылады. Сондай-ақ қатысушыларға Decentrathon жобасының шектеулі топтамадағы фирмалық сыйлықтары қарастырылған.
Алматы облысының тұрғындары қайда жиналады?
Алматы облысының тұрғындары хакатонға онлайн немесе офлайн форматта қатыса алады.
Өңірдегі негізгі алаң Қонаев қаласында орналасқан Alatau Hub орталығында ұйымдастырылады.
Мекенжайы: Қонаев қаласы, Қонаев тұйығы, 5Б.
Жарыстың тапсырмалары 30 қазан күні сағат 11:00-де жарияланады. Қатысушылар дайын жобаларын 31 қазан сағат 23:59-ға дейін тапсыруы тиіс.
Жеңімпаздардың есімдері 10 қараша күні онлайн форматта жарияланады.
Тіркелу 29 қазанға дейін жалғасады
Хакатонға қатысу үшін 29 қазан сағат 23:59-ға дейін тіркелу қажет.
Өтінімдер edu.astanahub.com платформасында қабылданады. Тіркелу сілтемесі decentrathon.ai ресми сайтында орналастырылған.
Ұйымдастырушылар өтінімді толтыру кезінде нақты тұрғылықты қаланы дұрыс көрсетудің маңызды екенін ескертеді.
Decentrathon 6.0 хакатонын Astana Hub және Blockchain & AI Technology Center (BAITC) Қазақстан Республикасының Жасанды интеллект және цифрлық даму министрлігінің қолдауымен ұйымдастырады.
Жоба еліміздегі технологиялық қауымдастықты дамытуға, жас таланттарды қолдауға және инновациялық идеяларды нақты өнімге айналдыруға бағытталған.
