Алдымен ауылдық округтерде салынып жатқан модульдік ветеринариялық пункттердегі жұмыстар қаралды. Негізгі назар құрылыс сапасына, нысандардың белгіленген талаптарға сәйкестігі мен жұмыстың аяқталу мерзіміне аударылды.
Тексеру барысында бірқатар кемшілік анықталып, мердігер ұйымдарға ескерту жасалды. Жауапты сала басшыларына олқылықтарды қысқа мерзімде жою жөнінде тапсырма берілді.
Сонымен қатар ветеринариялық пункттердің тек құрылыс талаптарына сай болуы жеткіліксіз екені, мұнда мамандардың күнделікті жұмысын тиімді ұйымдастыру үшін қажетті жағдай жасалуы керектігі айтылды.
Жұмыс сапары бірнеше ауылдық округте салынып жатқан мал қорымдарын тексерумен жалғасты. Бұл нысандарда санитариялық-ветеринариялық талаптардың сақталуы, аумақтың қоршалуы, кіреберіс жолдардың жағдайы және қауіпсіздік шаралары қаралды.
Жауапты мамандар мен мердігерлерге құрылыс сапасын тұрақты бақылауда ұстап, нысандарды белгіленген мерзімде толық әрі талапқа сай аяқтау міндеті қойылды.
Ветеринариялық инфрақұрылымды жаңарту аудандағы эпизоотиялық тұрақтылықты сақтауда маңызды рөл атқарады. Жаңа пункттер ветеринар мамандардың жұмысын жүйелеуге мүмкіндік берсе, талапқа сай салынған мал қорымдары биологиялық қалдықтарды қауіпсіз орналастыруға және жұқпалы аурулардың таралу қаупін төмендетуге бағытталған.
