Қала әкімінің айтуынша, қазірде Алатаудың инвестициялық пулында 60-тан астам жоба бар. Олардың қатарында өндіріс, логистика, сауда, қызмет көрсету және жаңа технологиялар салаларын қамтитын ауқымды бастамалар бар. Атап айтқанда, инвестициялық құны 50 млрд теңгеден асатын бірқатар ірі жоба жүзеге асырылуда. Олардың қатарында PepsiCo компаниясының тұзды тағамдар өндіретін зауыты, «Гриффин Логопарк» А сыныбындағы логистикалық кешені, G-Trans Service индустриялық-логистикалық хабы, Mars компаниясының үй жануарларына арналған азық өндіретін зауыты бар.
«Urban Air Mobility қалалық әуе мобильдігін дамыту, «Жетіген» сауда-логистикалық орталығын салу және K-PARK мәдени-іскерлік орталығы мен тақырыптық паркін құру жобалары да қолға алынған»,-дейді Алатау қаласының әкімі Әркен Өтенов.
Аталған инвестициялық бастамалар қаланың экономикалық құрылымын әртараптандыруға, өндірістік және логистикалық мүмкіндіктерін кеңейтуге, сондай-ақ жаңа технологияларды енгізуге бағытталған.
Жобалар толық іске қосылған кезде 5 мыңнан астам жаңа жұмыс орнын ашу көзделіп отыр. Бұл қала тұрғындарының жұмыспен қамтылуына, жаңа кәсіптік мүмкіндіктердің қалыптасуына және Алатаудың ірі инвестициялық әрі экономикалық орталық ретінде дамуына ықпал етеді.
