Полиция мәліметінше, жыл басынан бері өңірде 10 мыңнан астам әкімшілік құқық бұзушылық тіркелген. Оның 239-ы қоғамдық орындарды ластауға қатысты болса, 9 878 дерек аумақтарды абаттандыру қағидаларын бұзумен байланысты болған. Құқық бұзушыларға жалпы сомасы 10 миллион теңгеден астам айыппұл салынған. Оның шамамен 6 миллион теңгесі өндірілген.
Ал «Таза Қазақстан» бағдарламасы іске қосылған 2024 жылдың сәуір айынан бері облыста қоғамдық орындарды ластау бойынша 4 866 құқық бұзушылық және абаттандыру талаптарын бұзудың 46 300 фактісі анықталған. Осы кезеңде салынған айыппұлдардың жалпы көлемі 169 миллион теңгеден асқан.
Брифинг барысында Рахым Толокұлов бақылау жұмыстарының жаңа форматына тоқталды.
«Қазіргі таңда жұмыс тек рейдтер арқылы ғана жүргізілмейді. Біз әкімдікпен және қоғам белсенділерімен бірлесіп, әлеуметтік желілерге күн сайын мониторинг жүргіземіз. Заңсыз қоқыс төгу деректерін анықтап, жедел әрекет етудеміз. Жыл басынан бері интернет мониторингі арқылы 24 рұқсатсыз қоқыс үйіндісі анықталды. Жалпы бағдарлама басталғалы әлеуметтік желілер арқылы 82 заңсыз қоқыс төгу орны анықталып, оның 65-і жойылды. Анықталған барлық деректер бойынша материалдар тиісті шара қабылдау үшін Экология департаментіне жолданады», – деді ол.
Қоғамдық бақылауды күшейту мақсатында өңірде полиция қызметкерлері, табиғатты қорғау органдары, еріктілер, қоғам белсенділері, бюджеттік ұйымдар мен бизнес өкілдерінің қатысуымен 30 мобильді топ құрылған. Рейдтік жұмыстарға жалпы 338 адам тартылған. Оның 313-і – полиция қызметкерлері.
Жыл басынан бері облыс аумағында 350 рейд ұйымдастырылған. Құзырлы органдар заңсыз қоқыс орындарын анықтау мен оларды жою жұмыстары алдағы уақытта да күшейтілген режимде жалғасатынын атап өтті.
