Тұрғындармен кездесуге Балқаш ауданының әкімі Азат Құтпанбетов, облыстық басқармалардың өкілдері мен аудан әкімдігінің жауапты қызметкерлері қатысты. Азаматтар өңір басшысына өз өтініштерін тікелей жеткізіп, қордаланған мәселелердің шешілу барысы туралы ақпарат алды.
Қабылдауда көтерілген негізгі мәселелердің бірі – елді мекендерді сапалы ауызсумен қамтамасыз ету. Қазіргі уақытта ауданның төрт ауылында су құбыры желілерінің тозуына байланысты ауызсу мәселесі толық шешілмеген. Желілерді жөндеуге 1,2 миллиард теңге қарастырылғанымен, бірқатар елді мекен тиісті бағдарламаға енбей қалған. Облыс әкімі бұл мәселені бақылауына алып, оны келесі жылы шешу жоспарланып отырғанын айтты. Сондай-ақ орынбасары Әсет Масабаевқа тиісті шаралар қабылдауды тапсырды.
Аудан тұрғындарын алаңдатқан тағы бір мәселе – Қонаев қаласы мен Балқаш ауданын байланыстыратын автомобиль жолының жағдайы. Тұрғындардың айтуынша, соңғы жылдары ауданға келетін туристер саны артып келеді. Алайда жолдың тозуы көлік қатынасына қолайсыздық туғызып отыр. Аталған бағытта ұзақ уақыт бойы күрделі жөндеу жүргізілмеген.
Жауапты сала өкілдері жолдың жөндеу жоспарына енгізілгенін және құрылыс жұмыстарын келесі жылы бастау көзделгенін хабарлады.
Кездесуде қоғамдық көлік қатынасын субсидиялау мәселесі де талқыланды. Халық саны аз ауылдарға қатынайтын автобус бағыттары экономикалық тұрғыдан тиімсіз болғандықтан, тасымалдаушылардың шығындары толық өтелмейді. Осыған байланысты тұрғындар қоғамдық көлік қызметін мемлекеттік қолдау қажеттігін жеткізді. Облыс әкімі ұсынысты қарастыратынын айтып, ауданға электробустар бөлу мүмкіндігі де зерделенетінін білдірді.
Сонымен қатар тұрғындар мобильді байланыс пен интернет сапасының төмендігіне шағымданды. Аудан әкімдігі мамандарының түсіндіруінше, мәселе байланыс сигналын тарататын инфрақұрылымның жеткіліксіздігіне байланысты. Қазіргі уақытта келесі жылы интернет сапасын жақсартуға бағытталған жоба әзірленген. Дегенмен байланыс желілерін жаңғырту кезең-кезеңімен жүргізілетіндіктен, мәселені бірден толық шешу мүмкін болмай отыр.
Жеке қабылдауда Топар өзенінің арнасын нығайту жұмыстарына қатысты мәселе де көтерілді. Тұрғындардың бірінің айтуынша, мердігер ұйым Іле өзенінен Топар арнасына келетін су ағынын тоқтатып, елді мекендерді су басу қаупінің алдын алу мақсатында жұмыстар жүргізген. Бұл мақсатқа 32 миллион теңге қарастырылғанымен, атқарылған жұмыс үшін төлем әлі жасалмаған. Оның үстіне нығайтылған аумақты өзен суы қайта шайып кеткен.
Аудан әкімдігінің өкілдері орындалған жұмыстарды растайтын құжаттарды рәсімдеу барысында қиындықтар туындағанын мәлімдеді. Сондай-ақ мердігер ұйым жүргізілген жұмыстарға кепілдік бермеген. Қазіргі уақытта аталған мәселе тиісті органдардың қарауында.
Қабылдау қорытындысында Шыңғыс Әрінов тұрғындар көтерген мәселелердің назардан тыс қалмайтынын атап өтті. Облыс әкімі жауапты басқармалар мен аудан басшылығына әрбір өтінішті жан-жақты зерделеп, заң аясында нақты шешім қабылдауды тапсырды.
