Сапар барысында аудан басшысы «Байсерке-Агро» ЖШС-нің егіс алқабына барып, сүрлемдік жүгеріні жинау жұмыстарын көрді. Қазіргі таңда ауданда мал шаруашылығына қажетті азық қорын жеткілікті көлемде дайындауға ерекше көңіл бөлініп отыр.
Биыл Талғар ауданында ауыл шаруашылығы дақылдарының жалпы егіс алқабы 20 мың гектарды құрайды. Оның 9,7 мың гектарына дәнді, 2,4 мың гектарына майлы дақылдар егілген. Сондай-ақ 537 гектарға көкөніс, 102 гектарға бақша дақылдары, 689 гектарға картоп орналастырылған. Мал азықтық дақылдардың үлесі 7 мың гектарға жетеді.
Қазіргі уақытта дәнді, майлы, көкөніс және бақша дақылдарын жинау жұмыстары кезең-кезеңімен жүргізілуде.
Мал азығын дайындау аясында сүрлемдік жүгеріні жинау басталды. Бүгінге дейін 150 гектар алқап орылып, 6 мың тонна өнім жиналды. Орташа өнімділік гектарына 400 центнерді құрап отыр.
Егістік алқаптардың өнімділігін арттыру мақсатында биыл 6100 тонна минералды тыңайтқыш сатып алынып, жоспар толық орындалды.
Ауданда су ресурстарын тиімді пайдалану бағытындағы жұмыстар да жалғасуда. Биыл су үнемдеу технологияларын 4814 гектар алқапқа енгізу жоспарланған. Қазіргі таңда оның 3897 гектарында тиісті технологиялар қолданылып отыр.
Аудан әкімдігі күзгі жиын-терім науқанын белгіленген мерзімде аяқтау, мал азығы қорын жеткілікті деңгейде қалыптастыру және ауыл шаруашылығында заманауи технологияларды кеңінен қолдану жұмыстарын бақылауда ұстап отыр.
