Академиялық қалашықты Қонаев қаласының «Жаңа Іле» аумағында салу жоспарланып отыр. Бастапқыда білім беру кешеніне 97 гектар жер қарастырылған. Кейін жобаның жалпы аумағы 250 гектарға дейін ұлғайтылып, оның 150 гектарын академиялық кампусқа бөлу көзделген.
Жоба аясында жаңа университет ашу, қазақстандық және шетелдік жоғары оқу орындарының филиалдарын орналастыру, ғылыми-зерттеу және инновациялық орталықтар құру жоспарланған. Сондай-ақ студенттерге арналған жатақханалар, кітапхана, спорт кешендері мен оқытушыларға арналған тұрғын үйлер салу қарастырылған.
Ғылым және жоғары білім министрлігінің мәліметінше, академиялық қалашықтың тұжырымдамасы бекітіліп, жоба Қонаев қаласының бас жоспарына енгізілген. Өңір экономикасының қажеттіліктеріне сәйкес мамандар даярлаудың басым бағыттары да айқындалған.
Дегенмен құрылысқа кірісу үшін алдымен аумақты қажетті инженерлік инфрақұрылыммен қамтамасыз ету керек. Қазіргі уақытта инвесторлар тарту және жоғары оқу орындарымен серіктестік орнату жұмыстары жүргізіліп жатыр.
Ғылым және жоғары білім вице-министрі Гүлзат Көбенованың айтуынша, академиялық қалашық жобасына отандық және шетелдік университеттер қызығушылық танытқан. Бірқатар жоғары оқу орнымен алдын ала келіссөздер жүргізілгенімен, әзірге нақты келісімдер жасалмаған.
Жобаны жүзеге асырудағы негізгі бағдар – 2029 жыл. Алайда құрылыс жұмыстарының басталу мерзімі мен алғашқы оқу ғимараттарының қашан пайдалануға берілетіні әлі нақтыланбаған.
Сонымен қатар Қонаевта аумағы шамамен 100 гектар болатын медициналық кампус салу мәселесі де қарастырылып жатыр. Бұл жоба да әзірге дайындық кезеңінде.
Осылайша, Қонаевты ірі білім және ғылым орталығына айналдыруды көздейтін ауқымды бастамалардың жүзеге асуы алдағы уақытта инфрақұрылым мәселелерінің шешілуіне, инвесторлар мен серіктес университеттердің тартылуына байланысты болмақ.
