Профилактикалық кездесу Қонаев қаласының көпсалалы колледжінде ұйымдастырылды. Іс-шараға Қонаев қаласы полиция басқармасы Криминалдық полиция бөлімінің бастығы, полиция подполковнигі Данияр Нұрсейітов және Қоғамдық қауіпсіздік бөлімінің бастығы, полиция капитаны Елдос Ақылбеков қатысты.
Кездесу барысында полиция қызметкерлері жастар арасында есірткі қылмысының алдын алу мәселесіне ерекше назар аударды. Студенттерге есірткі заттарын заңсыз сақтау мен таратудың құқықтық салдары түсіндіріліп, есірткі тасымалдауға немесе жасырын орындарға қалдыруға байланысты заңсыз әрекеттерге араласудың қауіпті екені ескертілді.
Әсіресе, әлеуметтік желілер мен мессенджерлер арқылы жоғары табыс ұсынатын күмәнді жұмыс хабарландыруларына сақтықпен қарау қажеттігі айтылды. Мұндай ұсыныстардың артында есірткі таратуға байланысты заңсыз әрекеттер тұруы мүмкін.
Сонымен қатар кездесуде интернет алаяқтық мәселесі қозғалды. Құқық қорғау органдарының өкілдері жастарға онлайн алаяқтықтың кең таралған тәсілдері, белгісіз нөмірлерден келетін қоңыраулар мен күмәнді хабарламалардың қаупі туралы ақпарат берді.
Мамандар жеке мәліметтерді, банк карталарының деректемелерін, құпиясөздер мен растау кодтарын бөгде адамдарға бермеуге кеңес берді. Сондай-ақ күмәнді сілтемелерге өтпеу және интернет арқылы жасалатын қаржылық операцияларға мұқият қарау қажеттігін ескертті.
Полиция қызметкерлері жастарды заңсыз әрекеттерден аулақ болуға, күмәнді ұсыныстарға сенбеуге және құқық бұзушылық белгілері байқалған жағдайда тиісті органдарға хабарласуға шақырды.
Кездесудің негізгі мақсаты – студенттердің құқықтық сауаттылығын арттыру, есірткі қылмысына тартылу қаупін төмендету және интернет алаяқтықтан сақтану дағдыларын қалыптастыру.
