Ұйымдастырушылардың мәліметінше, мерекелік аптаның әр күні жеке тақырыпқа арналады. Бағдарлама қала тұрғындары мен қонақтарының әртүрлі жас санатын қамтитындай етіп жасалған.
Мерекелік шаралардың негізгі мақсаты – тұрғындарға көтеріңкі көңіл күй сыйлаумен қатар, жастардың қоғамдық белсенділігін арттыру, бұқаралық спортты дамыту, мәдени құндылықтарды дәріптеу және туған өлкеге деген сүйіспеншілікті нығайту.
Алты күнге созылатын мерекенің негізгі шаралары 26 қыркүйекте өтеді.
Қала күнінің қорытынды күні Қонаев есімімен тығыз байланысты көрнекті мемлекет қайраткері Дінмұхамед Ахметұлы Қонаевтың ескерткішіне гүл шоқтарын қою рәсімінен басталады.
Ресми бөлімнен кейін қала көшелерінде авто және мотошерулер ұйымдастырылады. Бұл күні Қонаевтың бірқатар аумағында мерекелік шаралар жалғасып, тұрғындар мен қала қонақтарына арналған түрлі бағдарламалар ұсынылады.
Қала күнін мерекелеудің қорытындысы ашық аспан астындағы концерттермен түйінделеді. Сахнада танымал өнерпаздар мен шығармашылық ұжымдар өнер көрсетеді.
