Жыл басынан бері арнайы комиссия көгілдір отынға қосылудан бас тартқан 469 пәтерді тексерді. Бұл туралы қала әкімі Асхат Бердіханов тұрғындармен кездесу барысында айтты.
Жиында қала басшысы жыл басынан бері атқарылған жұмыстарды қорытындылап, алдағы жоспарларға тоқталды. Кездесуде Қонаевты газдандыру, жылыту маусымына дайындық және тұрғындардың қауіпсіздігін қамтамасыз ету мәселелеріне ерекше назар аударылды.
Қазіргі уақытта қаланың №19, №20, Арна, Спутник және Рауан шағынаудандарында газ желілерін тарту жұмыстары жүргізіліп жатыр. Жобаларды 2025-2027 жылдар аралығында кезең-кезеңімен аяқтау жоспарланған. Сонымен қатар саяжай алқаптарын газбен қамту үшін жобалық-сметалық құжаттама әзірленуде.
Қала әкімінің мәліметінше, газ комиссиясы көгілдір отынға қосылудан бас тартқан 469 пәтерді тексерген. Нәтижесінде тұрғындарға газ жабдықтарын қауіпсіз пайдалану және белгіленген талаптарды сақтау жөнінде 112 хабарлама берілді. Ал 58 пәтер электр плиталарын пайдалануға көшкен.
«Алда жылыту маусымы келеді. Оған дайындықты қазірден бастау қажет. Көгілдір отынның жабдықтарын пайдалану кезінде қауіпсіздік талаптарын қатаң сақтау керек. Былтыр Қонаевта газ-ауа қоспасының жарылыстары орын алды. Мұндай жағдайлардың алдын алу – ортақ міндет. Сондықтан газ комиссиясының жұмысы алдағы уақытта да жалғасады», – деді Асхат Бердіханов.
Кездесуде газ қауіпсіздігімен қатар қаланың инженерлік инфрақұрылымына қатысты бірқатар мәселе көтерілді. Атап айтқанда, №8-10 шағынаудандардың тұрғындары ауыз су мен кәріз жүйелерінің сапасына шағымданды. Кәріз желісінің жұмысына қатысты мәселені Қарлығаш шағынауданының тұрғындары да көтерді.
Осыған байланысты қала әкімі аталған аумақтарда салынған инженерлік желілердің жағдайын қосымша тексеруді тапсырды.
Қарлығаш шағынауданында электр энергиясының жиі өшуі де тұрғындарды алаңдатып отыр. Қазіргі уақытта бұл аумақта жаңа электр желілерін тарту жұмыстары жүргізілуде.
Ал Әсемтас шағынауданының тұрғындары электр желісіндегі кернеудің төмендігін айтып, балалар ойын алаңын салу қажеттігін көтерді. Қала басшысы тұрғын үй-коммуналдық шаруашылық бөліміне айтылған мәселелерді зерделеп, тиісті шаралар қабылдауды тапсырды.
Кездесу қорытындысында тұрғындар көтерген инженерлік инфрақұрылым мәселелері жауапты бөлімдердің бақылауына алынды.
