Экологиялық іс-шараларға қала тұрғындары, еріктілер мен мемлекеттік қызметшілер белсенді атсалысты. Сенбіліктер барысында көшелер, қоғамдық орындар мен өзге де аумақтар қоқыстан тазартылып, қаланың санитарлық жағдайын жақсартуға бағытталған жұмыстар жүргізілді.
Қала тазалығын қамтамасыз етуге әкімдікке қарасты «Жасыл қала Қонаев» мемлекеттік коммуналдық кәсіпорны жауапты. Мекеме қызметкерлері күн сайын көшелер мен қоғамдық орындарды тазалап, шөп қалдықтарын жинайды және рұқсат етілмеген қоқыс орындарын жоюмен айналысады.
Қоршаған ортаның ластануын бақылауда цифрлық технологиялар да қолданылып жатыр. Атап айтқанда, «Ғарыш сапары» геопорталы арқылы Қонаев қаласының аумағында 19 заңсыз қоқыс үйіндісі анықталған. Бүгінде олардың барлығы толық тазартылды. Бұдан бөлек, коммуналдық кәсіпорын қызметкерлері қала аумағына тұрақты мониторинг жүргізіп, жаңадан пайда болған қоқыс орындарын анықтау және жою жұмыстарын жалғастырып жатыр.
Қала тұрғындары да тазалық мәселелерін шешуге белсенді қатысып келеді. Олар анықталған заңбұзушылықтар мен санитарлық мәселелер туралы «Taza Qazaqstan» Telegram-боты арқылы хабарлай алады. Жыл басынан бері аталған платформа арқылы 28 өтініш келіп түскен. Олардың барлығы белгіленген тәртіппен қаралып, тұрғындар көтерген мәселелер бойынша тиісті тазалық жұмыстары жүргізілді.
Қала әкімдігінің мәліметінше, санитарлық тазалықты сақтау және заңсыз қоқыс үйінділерінің алдын алу жұмыстары тұрақты түрде жалғасады. Бұл шаралар қаланың экологиялық жағдайын жақсартуға, тұрғындардың қоршаған ортаға жауапкершілігін арттыруға және қоғамдық орындардың тазалығын қамтамасыз етуге бағытталған.
