«ҚазАвтоЖол» ұлттық компаниясының мәліметінше, биыл қаңтар-қазан айлары аралығында елдегі ақылы автомобиль жолдарында 68,3 миллион көлік жүріп өту дерегі тіркелді. Оның 33,5 миллионы немесе 49,1 пайызы қозғалыс ең қарқынды бес бағытқа тиесілі.
Рейтинг көшін Алматы мен Қонаев қалаларын байланыстыратын тасжол бастады. Аталған бағытта он ай ішінде 10 834 980 көлік жүріп өту жағдайы тіркелген. Бұл көрсеткіш бойынша Алматы – Қонаев жолы екінші орында тұрған Шымкент – Өзбекстан шекарасы бағытынан 2,8 миллионға жуық жүріп өту дерегіне алда тұр.
Екінші орынға Шымкент – Өзбекстан шекарасы тасжолы жайғасты. Мұнда 8 033 519 көлік жүріп өту дерегі тіркелген. Үздік үштікті 5 652 809 көрсеткішпен Шымкент – Тараз бағыты түйіндеді.
Ең көп пайдаланылатын ақылы жолдардың алғашқы бестігіне Тараз – Қайнар және Шымкент – Қызылорда бағыттары да енді. Бұл учаскелерде тиісінше 4,9 миллион және 4 миллионнан астам жүріп өту жағдайы тіркелген.
Алматы облысы аумағындағы тағы екі ақылы жол да республикалық рейтингте жоғары орындарға ие болды. Атап айтқанда, Қонаев – Талдықорған тасжолы 3 193 009 көрсеткішпен сегізінші орынға тұрақтады. Ал Алматы – Қорғас бағытымен 2 262 135 көлік жүріп өту дерегі тіркеліп, бұл учаске 12-орынға орналасты.
Орталық және солтүстік өңірлердегі ақылы жолдарда да көлік қозғалысы қарқынды болған. Мәселен, Астана – Теміртау бағытында 3,7 миллионға жуық, ал Астана – Щучинск тасжолында 3,4 миллионнан астам жүріп өту дерегі есепке алынған.
Жалпы, Қазақстандағы ең көп пайдаланылатын он ақылы жол учаскесінде 48,8 миллион жүріп өту жағдайы тіркелді. Бұл елдегі ақылы жолдар бойынша жалпы көрсеткіштің 71,5 пайызын құрайды. Демек, көлік ағынының басым бөлігі республикалық маңызы бар негізгі бағыттарға шоғырланған.
Алматы – Қонаев тасжолының рейтингте көш бастауы екі қала арасындағы көлік қатынасының жоғары қарқынмен жүріп жатқанын көрсетеді. Бұл бағыт облыс орталығын Алматы қаласымен байланыстыратын негізгі көлік дәліздерінің бірі саналады. Сонымен қатар Қонаев – Талдықорған және Алматы – Қорғас жолдарының да алғашқы 12 орынға енуі Алматы облысының республикалық көлік жүйесіндегі маңызын айқындайды.
Ұлттық компания өкілдері жарияланған статистиканың ерекшелігіне де назар аударды. Көрсеткіштер жолмен жүрген бірегей автомобильдердің санын емес, ақылы учаскелер арқылы тіркелген жүріп өту жағдайларын білдіреді. Яғни бір көлік белгілі бір бағытпен бірнеше рет қатынаса, оның әрбір жүріп өтуі жеке есепке алынады.
Осылайша, 2026 жылдың он айындағы деректер Алматы – Қонаев тасжолының Қазақстандағы көлік қозғалысы ең қарқынды ақылы жол екенін көрсетті.
