Жұмыс сапары барысында Бас штаб бастығы курсты өткізуге дайындық деңгейін тексеріп, оқу инфрақұрылымымен танысты. Ол оқу сыныптарын, нұсқаушылардың орналасу орындарын, спорт залын, сондай-ақ Қапшағай су қоймасының акваториясында су даярлығына арналған оқу-материалдық базаны аралап көрді.
Салтанатты рәсімде сөз сөйлеген Қаныш Әбубәкіров «Nomad» курсы арнайы мақсаттағы бөлімдерде қызмет атқарудың маңызды кезеңі екенін атап өтті.
««Nomad» курсынан өту – арнайы мақсаттағы бөлімдерде әскери қызмет өткерудің міндетті шарты. Бағдарлама кез келген жағдайда жеке және топ құрамында жауынгерлік міндеттерді тиімді орындай алатын әмбебап әскери мамандарды даярлауға бағытталған», – деді генерал-лейтенант.
Курс бағдарламасы екі кезеңнен тұрады: «Сынақ» және «Жетілу».
Алғашқы кезеңде әскери қызметшілер іріктеуден өтіп, су және атыс даярлығы бойынша машықтарын жетілдіреді, әскери топографияны меңгеріп, жергілікті жерде бағдарлау дағдыларын шыңдайды. Бұдан кейін олар өздерінің функционалдық міндеттеріне сәйкес мамандандырылған дайындықтан өтеді.
Ал «Жетілу» кезеңі әскери қызметшілердің кәсіби біліктілігін бекітуге және дамытуға бағытталған. Бұл кезеңде алған білім мен тәжірибе нақты жауынгерлік жағдайларға барынша жақын ортада тәжірибе жүзінде пысықталады. Сонымен қатар дайындық деңгейін бағалау үшін бақылау сабақтары ұйымдастырылып, курс тактикалық-арнайы оқу-жаттығулармен қорытындыланады.
«Nomad» курсының жалпы ұзақтығы 8,5 айды құрайды. Оқу-жаттығулар 20030 әскери бөлімінің базасында және Қапшағай су қоймасының акваториясындағы әскери нысандарда өткізіледі.
Мамандардың айтуынша, бұл курс Арнайы операциялар күштері әскери қызметшілерінің кәсіби даярлығын жаңа деңгейге көтеріп, олардың күрделі жауынгерлік міндеттерді орындауға дайындығын арттыруға бағытталған.
