Президент өз бастамасымен бастау алған бұл акцияның былтырдан бері қарқынды түрде жүзеге асып келе жатқанын атап өтті. Жалпыұлттық жоба аясында 6 миллионнан астам азамат қатысып, 1,6 миллион тоннадан аса қоқыс жиналған, сондай-ақ 3,3 миллионнан астам көшет отырғызылған.
«‘Таза Қазақстан’ – бұл бүгінгі және болашақ ұрпақтың жарқын келешегіне жол ашатын маңызды бастама. Сондықтан бұл жұмысты үздіксіз әрі жүйелі түрде жалғастыру қажет. Әрбір азамат, әсіресе жастар тазалықты, ұқыптылықты және жауапкершілікті бойына сіңіруі тиіс. Тазалық – бұл тек сыртқы тәртіп қана емес, бұл рухани құндылық. Ары таза адам ешқашан еліне опасыздық жасамайды», – деді Президент.
Мемлекет басшысы «Қазақстан – ортақ үйіміз» деген қағиданы ұстана отырып, елдің әрбір өңірінде тазалықты сақтаудың маңызын ерекше атап өтті. Ол «Таза Қазақстан» идеясын насихаттауда Қазақстан халқы Ассамблеясының белсенді үлесін жоғары бағалап, бұл бастаманы барлық өңірлерде қолдап, әр үйден бастап жүзеге асыру қажеттігін айтты.
«Бұл – жай ғана экологиялық шара емес, бұл – өскелең ұрпаққа сапалы тәрбие мен патриоттық рух берудің жолы. Әрбір қала, ауыл, көше мен аула тұрғындары осы іске атсалысуы керек. ‘Таза Қазақстан’ – бұл біздің ішкі мәдениетіміздің, шынайы отаншылдығымыздың көрінісі. Баршамыз Әділетті, Қауіпсіз және Таза Қазақстанда өмір сүргіміз келеді», – деп түйіндеді Қасым-Жомарт Тоқаев.
Фото: 13kz.kz
