Аталған құжат Мемлекет басшысының 2025 жылғы Жолдауында берілген тапсырмаларға сәйкес әзірленген. Заң жобасы Алатау қаласын заманауи, экологиялық таза және технологиялық тұрғыдан дамыған қала ретінде қалыптастыруды көздейді. Сонымен қатар қала өзіндік қаржы моделі, арнайы салық режимі және жаңартылған басқару жүйесі бар дербес экожүйе ретінде дамытылмақ.
Жаңа басқару моделінің негізгі тетігі ретінде арнайы қала кеңесін құру ұсынылып отыр. Бұл орган қаланың даму бағыттарын айқындап, мемлекеттік органдардың қызметін үйлестіреді. Кеңес құрамын Мемлекет басшысы бекітеді, ал төрағасы ретінде Премьер-Министр белгіленеді.
Премьер-Министрдің орынбасары Қанат Бозымбаевтың айтуынша, заң жобасы Алатау қаласының жедел әрі тұрақты дамуына жағдай жасау мақсатында әзірленген.
Құжатты әзірлеу барысында халықаралық тәжірибе, соның ішінде Сингапур мен Дубайдың үлгілері ескерілген. Бұл тәсіл қалаға басқару, салық салу және инвестиция тарту мәселелерін дербес шешуге мүмкіндік бермек. Сондай-ақ халықаралық стандарттар мен техникалық регламенттерді енгізуге жол ашылады.
Заң жобасы бірқатар маңызды бағыттарды қамтиды:
- жергілікті мемлекеттік басқару жүйесін жетілдіру;
- цифрлық активтердің айналымын реттеу;
- төмен биіктіктегі әуе кеңістігін пайдалану және ұшу аппараттарын дамыту;
- инвестициялардың қорғалуын қамтамасыз ету;
- арнайы салық режимі мен ерекше бюджет қатынастарын енгізу.
Қазіргі таңда жалпы құны 1,8 трлн теңгені құрайтын 44 инвестициялық жоба қарастырылып отыр. Бұл жобалар шамамен 30 мың жаңа жұмыс орнын ашуға мүмкіндік береді. Ұзақ мерзімді перспективада, 2050 жылға дейін, қала инфрақұрылымын дамытуға 10 трлн теңгеге жуық қаржы қажет болады. Сонымен қатар 50 млрд АҚШ долларына дейін шетелдік инвестиция тарту жоспарланып отыр.
Инновациялық көлік жүйелерін дамытуға да ерекше назар аударылған. Атап айтқанда, аэротакси мен жүк дрондарын іске қосу, Алатауды Алматы, Қонаев қалаларымен және туристік аймақтармен байланыстыратын вертопорттар салу көзделуде. Болашақта туристер Алматы халықаралық әуежайы арқылы «Медеу» спорт кешеніне жедел жету мүмкіндігіне ие болады.
Заң жобасының екінші оқылымы 2026 жылдың 27 наурызында өтеді. Құжатты ай соңына дейін Мемлекет басшысының қарауына енгізу жоспарланып отыр.
Жалпы, бұл бастама Алатау қаласын инвестициялар мен инновацияларды тартатын жаңа орталыққа айналдырып, оны тұрақты даму мен тиімді басқарудың заманауи талаптарына сай қалыптастыруға бағытталған.
