ҚР Мемлекеттік қызмет істері агенттігінің Алматы облысы бойынша департаменті Мемлекеттік қызмет басқармасының басшысы Айзада Ерланның айтуынша, бұл өзгерістер мемлекеттік басқару жүйесіне білімді әрі білікті жастарды тартуға бағытталған.
Қазақстан Республикасының 2026 жылғы 19 мамырдағы №290 Заңымен мемлекеттік қызмет саласындағы заңнамаға бірқатар өзгеріс енгізіліп, конкурссыз мемлекеттік қызметке орналасу мүмкіндігі кеңейтілген.
Айзада Ерланның мәліметінше, жоғары және жоғары оқу орнынан кейінгі білім беру бағдарламаларын GPA көрсеткіші кемінде 3,33 деңгейінде аяқтаған түлектер оқуын тәмамдаған күннен бастап бір жыл ішінде бірқатар әкімшілік мемлекеттік лауазымдарға конкурссыз орналаса алады.
Бұған дейін мұндай мүмкіндік негізінен мемлекеттік тапсырыс аясында білім алған түлектерге беріліп келген. Ал 2026 жылғы 1 шілдеден бастап бұл талап ақылы негізде оқыған, бірақ GPA көрсеткіші 3,33-тен төмен емес түлектерге де қолданылады.
Қандай қызметтерге орналасуға болады?
Жеңілдетілген тәртіп мемлекеттік қызметтегі барлық лауазымды қамтымайды. Ол негізінен аудандық және жергілікті деңгейдегі төменгі және басшы емес лауазымдарға қатысты.
Атап айтқанда, талапқа сай түлектер аудан немесе облыстық маңызы бар қала әкімдері мен мәслихаттары аппараттарының төменгі лауазымдарына, сондай-ақ жергілікті бюджеттен қаржыландырылатын атқарушы органдардың басшы емес қызметтеріне орналаса алады.
Сонымен қатар аудандық маңызы бар қала, ауыл, кент және ауылдық округ әкімдері аппараттарының басшы емес лауазымдары да осы тізімге кіреді. Орталық мемлекеттік органдар мен олардың ведомстволарының аудандардағы немесе облыстық маңызы бар қалалардағы аумақтық бөлімшелерінің бірқатар басшы емес лауазымдары да қамтылған.
Айзада Ерлан бұл тетіктің жастармен қатар жергілікті мемлекеттік басқару жүйесі үшін де маңызды екенін атап өтті. Оның сөзінше, оқу орнында жоғары нәтиже көрсеткен, жаңа ортаға тез бейімделетін жас мамандарды мемлекеттік қызметке тарту мемлекеттік аппараттың кәсіби әлеуетін арттыруға мүмкіндік береді.
Алматы облысында 93 түлек жұмысқа орналасқан
Жастарды мемлекеттік қызметке конкурссыз қабылдау тетігінің нәтижесі нақты көрсеткіштерден де байқалады.
Департамент өкілінің дерегінше, 2023 жылдан бері республика бойынша аудандық және ауылдық жерлердегі төменгі лауазымдарға 1097 түлек конкурссыз тағайындалған. Оның ішінде 93 жас маман Алматы облысында мемлекеттік қызметке орналасқан.
Айзада Ерланның айтуынша, мемлекеттік қызметке орналасудың жеңілдетілген тәртібі жастарға алған білімін ел игілігіне жұмсауға, туған өңірінде еңбек етуге және мемлекеттік басқару саласындағы кәсіби жолын ерте бастауға мүмкіндік береді.
Мемлекеттік қызмет – тек тұрақты жұмыс орны емес. Ол халықпен тікелей жұмыс істеп, өңірдің әлеуметтік-экономикалық дамуына араласуға және қоғам үшін маңызды шешімдердің жүзеге асуына үлес қосуға мүмкіндік беретін жауапты сала.
Осы тұрғыдан алғанда, жаңа өзгерістер мемлекеттік қызметке қабылдау рәсімін жеңілдетумен ғана шектелмейді. Ол жоғары нәтиже көрсеткен түлектерді өңірлерге тартудың және мемлекеттік аппаратты жас кадрлармен толықтырудың қосымша тетігіне айналмақ.
Енді жоғары GPA – жақсы дипломның көрсеткіші ғана емес, жас маманның мемлекеттік қызметтегі кәсіби жолын бастауына мүмкіндік беретін артықшылықтардың бірі.
