Мерекелік шара Бердібек Соқпақбаев атындағы саябақ аумағында өтті. Бұл күні саябақ этно-музейге айналып, келушілер қазақ халқының дәстүрлі қолөнері мен тарихи мұрасымен танысты.
Фестиваль аясында ұсталар темір соғып, зергерлер күміске өрнек түсіріп, шеберлер киіз басу мен ағаш ою өнерінің қыр-сырын көрсетті. Келушілер ұлттық қолөнер бұйымдарының жасалу процесін тамашалап, шеберлермен еркін пікір алмасты.
Шара барысында Алматы облысы музейлері бірлестігі қорында сақталған сирек жәдігерлер де көпшілік назарына ұсынылды. Олардың қатарында Жамбыл Жабаевтың өзі пайдаланған тұрмыстық бұйымдар, сақ дәуіріне жататын археологиялық жәдігерлер, б.з.д. V–IV ғасырлардағы көне қыш ыдыстар коллекциясы және әйгілі Алтын адам экспозициясы болды.
Сонымен қатар, фестиваль қонақтары ХХ ғасырдағы магнитофондар, кинопроекторлар мен бейнекамералар секілді көне радиотехникаларды тамашалады.
Биылғы фестиваль қазақтың белгілі этнографы әрі ұста Дәркембай Шоқпарұлының 80 жылдығына арналды. Шараға оның шәкірттері, ізбасарлары және шетелден келген қолөнершілер қатысты.
Фестивальге келген қала тұрғындарының бірі Айдана Нұрбекқызы мұндай шаралардың ұлттық мәдениетті насихаттаудағы маңызы зор екенін айтты.
«Балаларымызға тарихымызды кітаппен ғана емес, осындай көрмелер арқылы көрсету өте маңызды. Қолөнер шеберлерінің жұмысын көзбен көру ерекше әсер сыйлайды», — деді ол.
Ал тағы бір тұрғын Ержан Сәрсенов фестивальдегі жәдігерлер көрмесі ерекше қызығушылық тудырғанын жеткізді.
«Жамбыл атамыздың жеке заттарын көру мен үшін ерекше әсер сыйлады», — деді тұрғын.
Шара аумағында арнайы этноауыл құрылып, ұлттық көрмелер ұйымдастырылды. Кешкі уақытта фестиваль этно-концертке ұласып, сахнада Жігер Ауыпбаев, Нұрсұлтан Нұрбердиев, Мақсат Рахмет, BAYANSULU және өзге де танымал өнерпаздар өнер көрсетті.
