Оның айтуынша, ұйымдастыру комитеті медальдар есебін қайта қарап, Қазақстанның үш спортшысы жеңіп алған жүлделерді жеке-жеке есептеу туралы шешім қабылдаған. Нәтижесінде Қазақстан құрамасы жалпы командалық есепте бірінші орынға шықты.
«Қазақ бауырларымызды жеңісімен құттықтаймыз», – деді Асқат Алагөзов.
Қырғызстан президентінің баспасөз хатшысы медальдарды есептеу кезінде техникалық айырмашылық болғанын атап өтті. Қайта есептеу осы мәселені нақтылауға мүмкіндік берген.
Сонымен қатар ол VI Дүниежүзілік көшпенділер ойындарының жоғары деңгейде өтіп, үлкен спорттық мерекеге айналғанын айтты. Оның сөзінше, спорттық бәсекелестік жарыс алаңында ғана қалып, Қазақстан мен Қырғызстан жанкүйерлері арасында ешқандай түсініспеушілік болмаған.
Алагөзов Қырғызстан спортшыларының да додада лайықты өнер көрсетіп, жоғары шеберлік танытқанын атап өтті.
Оның айтуынша, медальдар есебі – жарыстың бір ғана бөлігі. Көшпенділер ойындарының басты нәтижесі – бәсекелердің өзара құрмет пен адал бәсекелестік жағдайында өтіп, қазақ пен қырғыз халықтарының бірлігін көрсетуі.
