Оқиға Іргелі ауылындағы мектепте болған. Телеарна мәліметінше, білім ордасындағы жөндеу жұмыстары шілде айының соңында басталып, жаңа оқу жылына дейін аяқталмаған. Соған қарамастан оқушылар мектеп ғимаратының бірінші қабатында білім алуды жалғастырған.
Ата-аналардың бірі Айман Токушеваның айтуынша, қызы сабақ кезінде өзін жайсыз сезінген. Сынып жетекшісі оқушының басы ауырғанын айтып, үйіне жіберген. Алайда анасы қызын қарсы алғанда оның қатты әлсіреп тұрғанын байқаған.
«Қызым басы айналып, жүрегі айнып, басы ауырғанын айтты. Содан кейін жедел жәрдем шақырдық. Дәрігерлер жағдайын тіркеп, бояуға аллергиялық реакция деген диагноз қойды», – деді ол.
Тағы бір ата-ана Жамиля баласының бастапқыда жөтеле бастағанын, кейін оған ентігу қосылғанын айтады. Оның сөзінше, баласының шаңға аллергиясы бар. Анасы мектептегі жөндеу жұмыстарын көргеннен кейін денсаулығының нашарлауы құрылыс жұмыстарымен байланысты болуы мүмкін деп күдіктенген.
Ата-аналар мектептің ескі ғимаратындағы жөндеу жұмыстары әлі аяқталмағанын айтып отыр. Олар балалардың денсаулығы мен қауіпсіздігіне алаңдап, жағдайды тексеруді талап етуде.
Ал мектеп директоры Гүлжахан Кенизбаева оқу процесі жөндеу жұмыстары жүргізіліп жатқан аумақтан оқшауланғанын мәлімдеді.
«Екі корпустың қосылған жерінен біз оқшаулап, есігін жауып тастағанбыз. Олар жөндеумен айналысып жатыр. Біз оқу процесімен айналысып жатырмыз. Бүгін балалар сабақта қалыпты жағдайда отыр. Дәл осы 7 бала келді бүгін. Өзіміздің педиатрымыз және бас дәрігер келіп, бақылауда ұстап отыр», – деді мектеп директоры.
Қазір ата-аналар денсаулығына байланысты мектепке бара алмай жүрген оқушыларға қашықтан білім алу мүмкіндігін қарастыруды сұрап отыр.
