Сахна мен экранда көптеген жарқын образды, соның ішінде ұлы Абайдың бейнесін сомдаған өнер қайраткері ел өміріндегі маңызды саяси науқаннан шет қалмай, азаматтық ұстанымын білдірді.
«Сахнада біз әрдайым шындық пен рухани тазалықты іздейміз. Ал Құрылтай сайлауы – әр азамат өз ұстанымын білдіріп, елдің болашағына қатысты таңдау жасай алатын маңызды сәт. Бүгін мен еліміздің тұрақтылығы, мәдениетіміздің дамуы және ұрпағымыздың жарқын болашағы үшін дауыс бердім», – деді Болат Әбділманов.
Болат Әбділманов – қазақ театр және кино өнерінде өзіндік қолтаңбасы қалыптасқан актер. Ол шығармашылық жолында тарихи тұлғалардан бастап, күрделі драмалық кейіпкерлерге дейін ондаған рөлді сомдады. Өнер саласына қосқан үлесі үшін «Қазақстан Республикасының еңбек сіңірген қайраткері» атағына ие болып, «Құрмет» орденімен марапатталған.
Актердің шығармашылық қоржынында «Абай», «Томирис», «Ревизор» және басқа да кинотуындылар мен театр қойылымдарындағы рөлдер бар.
Айта кетейік, бүгін, 23 тамызда Қазақстанда Құрылтай депутаттарын сайлау өтіп жатыр. Алматы облысында 683 сайлау учаскесі жұмыс істейді. Өңірде 1 042 987 азаматтың дауыс беруге құқығы бар. Оның ішінде 14 104 тұрғын сайлауға алғаш рет қатысу мүмкіндігіне ие болды.
