Әлеуметтік желіде жарияланған видео Райымбек ауданындағы Ақкөл жайлауында түсірілген. Кадрлардан қалың тұман арасындағы тау беткейлерін қар басқанын көруге болады. Жаздың соңғы күндеріндегі мұндай көрініс өңірдегі ауа райының күрт құбылуымен байланысты.
«Қазгидромет» бұған дейін Алматы облысында ауа райы бұзылатынын ескерткен еді. Синоптиктердің болжамынша, 25 тамызда өңірдің басым бөлігінде жаңбыр жауып, кей жерлерде жауын-шашын күшейеді. Таулы және тау бөктеріндегі аудандарда жаңбыр, ал облыстың батысы мен оңтүстігінде, сондай-ақ таулы аймақтарда найзағай ойнап, бұршақ жауып, екпінді жел соғуы мүмкін екені хабарланған.
Таулы аймақтарда күндізгі ауа температурасы 13-18 градус шамасында болжанды. Ал биіктік артқан сайын температураның төмендеуі жауын-шашынның қарға ұласуына себеп болған.
