Аудан әкімдігінің мәліметінше, жол инфрақұрылымын жақсарту мәселесі аудан әкімі Қайыржан Жақсымбетовтің тұрғындармен кездесулерінде бірнеше рет көтерілген. Әсіресе, ауылішілік жолдардың жағдайына қатысты өтініштер жиі түскен.
Тұрғындардың ұсыныстары негізінде жауапты мамандар жолдардың техникалық жағдайын зерделеп, жөндеуді қажет ететін учаскелерді анықтаған. Кейін тиісті сметалық құжаттар әзірленіп, бірқатар нысан 2026–2027 жылдарға арналған өтпелі жобалар тізіміне енгізілген.
Қазіргі уақытта ауданның бірнеше елді мекенінде жол жөндеу жұмыстары жүргізілуде.
Атап айтқанда, Боралдай кентіндегі Көкжиек көшесі мен Байкент ауылдық округіндегі автомобиль жолы жөнделіп жатыр. Сонымен қатар Ақсай ауылындағы төрт көшеде, Байсерке ауылындағы Қоңырөлең және Іле көшелерінде жол инфрақұрылымын жаңарту жұмыстары қолға алынған.
Бұдан бөлек, Қосөзен ауылындағы Жасұлан көшесі мен Кенен Әзірбаев ауылындағы Степная көшесінде де жол жөндеу жұмыстары жалғасуда.
Жоспарға сәйкес, аталған жол учаскелеріндегі жұмыстар 2026 жылдың қараша айына дейін аяқталуы тиіс.
Аудан әкімдігі жөндеу жұмыстарының сапасы мен белгіленген мерзімде орындалуы аудан әкімі Қайыржан Жақсымбетовтің және аудандық жолаушылар көлігі және автомобиль жолдары бөлімінің тұрақты бақылауында екенін айтады.
Жергілікті атқарушы органдар алдағы уақытта да тұрғындар көтерген мәселелерді ескере отырып, елді мекендердің жол инфрақұрылымын жақсарту жұмыстарын кезең-кезеңімен жалғастыруды жоспарлап отыр.
