«Алатау жарық компаниясының» «Энергосбыт» филиалының мәліметінше, электр энергиясына берешегі бар басқарушы компанияларға қарасты тұрғын үйлерге қатысты заңнамада және электрмен жабдықтау шарттарында көзделген шаралар қолданылмақ.
«2026 жылғы 14 қыркүйектен бастап электр қуатына берешегі бар басқарушы компанияларға қарасты тұрғын үй кешендерінің борышкерлеріне қатысты заңнамада және электрмен жабдықтау шарттарында көзделген шаралар қолданылады. Электр қуатын беруді шектеуге немесе толықтай тоқтатуға дейін шаралар қолданылуы мүмкін», – деп хабарлады компания.
Жалпы борышкерлер тізіміне Алматы мен Алматы облысындағы 38 тұрғын үй кешені, тұрғын алап пен өзге де нысандар енгізілген. Ең ірі берешек «Medeu city» тұрғын үй кешеніне тиесілі – 102,18 млн теңге. Одан кейін «Мирас» – 48,51 млн теңге, «Etasa Резиденс» – 40,77 млн теңге, «Meridian Apartments» – 39,48 млн теңге және «Four Seasons» тұрғын үй кешені 28,76 млн теңге қарыз болған.
Тізімде қарызы бірнеше миллион теңгеден асатын ондаған нысан бар. Мәселен, «Өжет» тұрғын үй кешенінің берешегі 28,4 млн теңге, «София» – 24,83 млн теңге, Ерменсай шағынауданы – 20,06 млн теңге, «Titul town» – 19,49 млн теңге, ал «Melody» тұрғын үй кешенінің қарызы 18,2 млн теңгені құрайды.
Энергетикалық компания жылыту маусымы жақындағанын еске салып, электр энергиясын тұрақты әрі үздіксіз жеткізу үшін тұтынылған қуаттың ақысын уақытылы төлеу маңызды екенін атап өтті.
Сонымен қатар тамыз айынан бастап тұрғындарға берілетін түбіртектерде МИБ, ПИК немесе басқарушы компанияның электр энергиясы үшін берешегі жеке жолмен көрсетіле бастаған. Сондықтан тұрғындарға өз үйінің қарызы бар-жоғын тексеру ұсынылады.
Егер тұрғын үйді басқарушы ұйым электр энергиясы бойынша берешекті жеке шоттарға бөлу жөнінде қосымша келісім жасаса, жарық бүкіл тұрғын үй кешенінде емес, тек электр қуатының ақысын төлемеген пәтерлерде ғана өшіріледі.
