Бұл туралы Алматы облысының Өңірлік коммуникациялар қызметінде өткен брифингте облыстық Төтенше жағдайлар департаменті Мемлекеттік өрт бақылау басқармасы бастығының орынбасары, азаматтық қорғау майоры Ержан Әділханов мәлімдеді.
Оның айтуынша, жыл басынан бері Алматы облысында 627 өрт тіркеліп, жеті адам зардап шеккен. Осыған байланысты жылыту маусымы қарсаңында тұрғын үй секторындағы профилактикалық жұмыстар күшейтілген.
“Біздің жұмысымыздың негізгі бағыты – тұрғын үй секторы. Барлық мүдделі қызметтермен және үкіметтік емес ұйымдармен бірлесіп, жүйелі профилактикалық жұмыстар жүргізіп келеміз. Әсіресе зейнеткерлердің, мүгедектігі бар азаматтардың, аз қамтылған және көпбалалы отбасылардың қауіпсіздігіне басымдық беріледі”, – деді Ержан Әділханов.
Төтенше жағдайлар департаментінің қызметкерлері елді мекендерді аралап, тұрғындарға пеш пен жылыту құрылғыларын қауіпсіз пайдалану талаптарын түсіндіруде. Бүгінге дейін мыңнан астам профилактикалық рейд жүргізіліп, бес мыңнан астам тұрғын қамтылған.
Мамандар улы газдан уланудың алдын алуға да ерекше назар аударып отыр. Осы мақсатта әлеуметтік осал санаттағы отбасылардың үйлеріне газ концентрациясын анықтайтын арнайы датчиктер орнатылуда. 2025–2026 жылдары мұндай 1 024 құрылғы қойылған.
Қазіргі уақытта 2026–2027 жылдардағы жылыту маусымына арналған өрттің алдын алу іс-шараларының жоспары бекітілді. Сонымен қатар ерекше бақылауды қажет ететін тұрғындардың тізімі жаңартылып жатыр. Тиісті ақпарат алу үшін қала және аудан әкімдіктеріне сұрау жолданған.
Брифинг барысында газ жүйелерінің қауіпсіздігі мәселесі де көтерілді. Қолданыстағы талаптарға сәйкес, газ жүйелерін бақылау мен қадағалау Төтенше жағдайлар департаментінің құзыретіне шектеулі көлемде кіреді. Бұл бағыттағы негізгі бақылау әкімдік жанынан құрылған газ-техникалық инспекцияға жүктелген.
Мамандар тұрғындарға жылыту маусымы басталғанға дейін пештер мен мұржаларды тексеріп, электр және газ жабдықтарының жарамдылығына назар аударуды ескертеді. Қарапайым қауіпсіздік талаптарын сақтау өрт пен улы газдан уланудың алдын алуға мүмкіндік береді.
