5 қыркүйекте өткен шарада Қарабұлақ ауылының тумасы Нұрбақыт Күрдешбайдың жаңа кітабының тұсаукесер рәсімі ұйымдастырылды.
«Жүректегі ауыл» жинағына туған жердің табиғаты, ауылдың тыныс-тіршілігі, ел мен жерге деген перзенттік сүйіспеншілік арқау болған. Ақын өз шығармалары арқылы ауыл өмірінің көріністерін суреттеп, туған өлкенің қадір-қасиетін жырға қосқан.
Тұсаукесерге ауылдық округ әкімі Рүстем Алимов, Қазақстан Жазушылар одағының мүшесі, Мұқағали Мақатаев медалінің иегері Мақсат Ережеп, спорт шеберлері Ермұрат Қайыпжанов пен Асхат Қасымханұлы, сондай-ақ зиялы қауым өкілдері қатысты. Қонақтар авторды жаңа кітабының жарық көруімен құттықтап, шығармашылығына сәттілік тіледі.
Әдеби кеш барысында Нұрбақыт Күрдешбайдың шығармашылығы таныстырылып, жинаққа енген өлеңдер оқылды. Сонымен қатар қатысушылар ана тілінің маңызы, туған жерге деген құрмет пен ұлттық құндылықтарды дәріптеу жөнінде ой бөлісті.
Қазақстан халқының тілдері күні аясында өткен әдеби басқосу ана тілі мен әдебиетті насихаттап, туған жерге деген сүйіспеншілікті дәріптеген тағылымды шараға айналды.
