Полиция мәліметінше, оқиға туралы хабарлама түскен сәттен бастап Жедел басқару орталығының мамандары күдіктілердің ықтимал қозғалыс бағыты бойынша орнатылған бейнебақылау камераларының жазбаларын талдауға кіріскен.
ЖБО операторлары мен полицияның жедел бөлімшелерінің үйлесімді жұмысының нәтижесінде қысқа уақыт ішінде қарақшылық шабуылға қатысы бар екі күдіктінің де жеке басы анықталды. Зияткерлік бейнебақылау жүйесінің көмегімен олардың жүріп өткен бағыты қалпына келтіріліп, жедел-іздестіру іс-шаралары барысында күдіктілер ұсталды.
Қазіргі уақытта олар уақытша ұстау изоляторына қамалып, тергеу амалдары жүргізіліп жатыр.
«Аталған дерек бойынша қарақшылық шабуыл фактісі бойынша қылмыстық іс тергелуде. Оқиғаның барлық мән-жайын жан-жақты, толық әрі объективті анықтауға бағытталған қажетті тергеу әрекеттері жүргізіліп жатыр», – деп хабарлады полиция.
Тәртіп сақшыларының айтуынша, қазіргі таңда заманауи бейнебақылау жүйелері мен Жедел басқару орталығының мүмкіндіктері қылмыстарды ашудың тиімді құралдарының біріне айналған. Бұл технологиялар күдіктілердің қозғалысын жедел анықтауға, полиция күштерінің іс-қимылын үйлестіруге және қылмыскерлерді ұстау уақытын едәуір қысқартуға мүмкіндік береді.
