Іс-шараға еліміздің барлық өңірінен келген белсенді жастар, мемлекеттік органдардың өкілдері мен жастар ұйымдарының мүшелері қатысты. Ұйымдастырушылардың айтуынша, жоба жастардың еңбекке деген қызығушылығын арттырып, экологиялық мәдениетті қалыптастыруға бағытталған.
Маусымның ашылуы аясында қатысушылар 100-ден астам көшет отырғызып, қоршаған ортаны қорғауға арналған экологиялық акцияға атсалысты. Шара барысында табиғатқа жанашырлықпен қарау мен экологиялық жауапкершілікті күшейту мәселесіне ерекше назар аударылды.
Биыл «Жасыл ел» жастар еңбек жасақтарының жұмысына 34 мыңнан астам адамды тарту жоспарланып отыр. Жоба дәстүрлі түрде жастарды қоғамдық пайдалы еңбекке баулып, экологиялық бастамаларға белсенді қатысуға және азаматтық жауапкершілікті қалыптастыруға үндейді.
Айта кетейік, «Жасыл ел» бағдарламасы елімізде жастарды маусымдық жұмыспен қамтуға және қоршаған ортаны қорғау мәдениетін дамытуға бағытталған ірі әлеуметтік жобалардың бірі болып саналады.
