Ұлттық парктың баспасөз қызметінің мәліметінше, табиғатты бүлдірген тұлғалар жедел түрде анықталған. Тексеру барысында тастарға жазу жазғандардың «Gemini Education» білім беру орталығының оқушылары екені белгілі болды.
Парк қызметкерлері жасөспірімдермен түсіндіру жұмыстарын жүргізген. Әңгімелесу барысында оқушылар өз әрекеттерінің заңсыз әрі орынсыз екенін түсінгендерін айтқан.
Осыдан кейін жасөспірімдер өздері жазған белгілерді тастардан толықтай өшіріп, сарқырама маңындағы аумақты бастапқы қалпына келтіру жұмыстарына қатысты. Сонымен қатар олар табиғи нысанға зиян келтіргендері үшін көпшілік алдында кешірім сұрады.
Ұлттық парк өкілдері табиғи аумақтардың баршаға ортақ құндылық екенін еске салып, тұрғындар мен туристерді қоршаған ортаға жанашырлықпен қарауға шақырды.
«Іле-Алатау ұлттық паркі табиғи аумақтардың баршаға ортақ байлық екенін ескертеді және қоршаған ортаға ұқыптылықпен қарауды сұрайды», — деп мәлімдеді мекеме өкілдері.
