Қайғылы оқиға 16 мамыр күні таңертең Қонаев — Бақанас тасжолында болған. Алдын ала мәлімет бойынша, полиция қызметкері қызметтік Hyundai Elantra автокөлігін басқарып келе жатқан. Көлік ішінде оның жұбайы да болған.
Тергеудің бастапқы нұсқасына сәйкес, жолда келе жатқан кезде ерлі-зайыптылар арасында жанжал туындаған. Соның салдарынан полицей Бақбақты ауылының маңында көлікті тоқтатып, әйелін жол жиегіне түсіріп кеткен.
Біраз уақыттан кейін жүргізуші райынан қайтып, жұбайын алып кету үшін кері бұрылған. Алайда Қонаев — Бақанас тасжолының 84-шақырымында ол жол үстінде тұрған әйелін байқамай қалып, қағып кеткен.
Ауыр жарақат алған әйел оқиға орнында көз жұмды.
Оқиға орнына полиция, прокуратура қызметкерлері мен Алматы облыстық полиция департаментінің жедел-тергеу тобы барған. Тексеру барысында полиция қызметкерінің қызметтік көлікті жол жүру парағы негізінде заңды түрде пайдаланғаны анықталған.
Аталған дерек ҚР Қылмыстық кодексінің 345-бабы 3-бөлігі бойынша сотқа дейінгі тергеп-тексерудің бірыңғай тізіліміне тіркелді. Қазіргі уақытта қажетті сараптамалар тағайындалып, тергеу амалдары жүргізіліп жатыр.
Әзірге Қазақстан Республикасы Ішкі істер министрлігі бұл оқиғаға қатысты ресми мәлімдеме жасаған жоқ.
