Тиісті бұйрыққа Қаржы министрі 2026 жылғы 15 қыркүйекте қол қойған. Өзгерістер Алматы агломерациясы аумағындағы Іле және Қарасай аудандарында орналасқан бірқатар жер учаскесіне қатысты.
Аталған аумақтарда ірі көлік-логистикалық нысандар мен уақытша сақтау қоймалары орналасқан. Қаржы министрлігінің №511 бұйрығына енгізілген өзгерістерге сәйкес, бірқатар жер учаскесі Алматы облысы бойынша мемлекеттік кірістер органдарының құзыретінен шығарылып, Алматы қаласы бойынша Мемлекеттік кірістер департаментінің қарауына беріледі.
Атап айтқанда, Іле ауданындағы Жетіген елді мекеніне, қазіргі Алатау қаласына жақын орналасқан аумақтар мен ҚазЦик ауылдық округіндегі логистикалық нысандар жаңа құзырет аймағына енеді. Қарасай ауданында өзгеріс Боралдай елді мекені маңындағы және Көкөзек есептік орамындағы нысандарға қатысты.
Осы аумақтарда жұмыс істейтін сыртқы экономикалық қызметке қатысушылар мен уақытша сақтау қоймаларының иелері үшін мемлекеттік кірістер органы өзгереді. Бұдан былай кедендік рәсімдер, декларацияларды ресімдеу және камералдық бақылау Алматы қаласы бойынша мемлекеттік кірістер органдарының құзыретінде болады.
Министрлік мұндай шешімнің мақсаты қарқынды дамып келе жатқан Алматы агломерациясында фискалдық бақылау мен кедендік әкімшілендіруді оңтайландыру екенін атап өтті.
