Аймақта білім беру саласында, соның ішінде кадр мәселесін шешуде, мемлекеттік бағдарламаларға қарастырылған қаржыны жұмсау мен мемлекеттік сатып алу барысында сыбайлас жемқорлық құқықбұзушылықтары белең алып жатыр.
Нақты фактілермен өңірлік антикоррупциялық қызмет басшысы растады.
«Олардың арасында Қапшағай қаласы білім беру бөлімінің басшысы Раиса Ешимова өзінің қызметтік жағдайын пайдалана отырып, алдын ала сөз байласу арқылы жүйелі негізде жеке кәсіпкерлердің есеп шотына олармен қызмет көрсетуге және орта мектептерде жұмыс көлемдерін нақты орындауға шарттар жасаспай, жалпы сомасы 1 млн теңгеден астам бюджеттік ақша қаражатын заңсыз аударғаны және жүйелі түрде пара алғаны үшін сотталды», – деді Серік Орымбетов.
Бұдан бөлек білім беру саласында қызмет атқарған:
- «Көксу ауданының білім бөлімі» ММ басшысы Т.С. білім беру мекемелерінде 9 дезинфекциялық туннель орнатқаны үшін пара алғандықтан;
- Қарасай ауданы Үштерек ауылының бұрынғы мектеп директоры Ж.Қ. мектепке жұмысқа орналастыру кезінде 200 000 теңге сомасында пара үшін;
- Еңбекшіқазақ ауданы Баяндай орта мектебінің директоры М.Қ. пара алғаны үшін сотталды және сот үкімімен мемлекеттік қызметте лауазымдарды атқару құқығынан өмір бойына айырылды.
Сонымен қатар облыстық білім басқармасының бұрынғы басшысы М.О. және оған қарасты коммуналдық мемлекеттік мекемесінің басшысы А.М, сондай-ақ білім басқармасының бас маманы Б.А. бір топ тұлғалардан 37 650 000 теңге аса ірі көлемде пара алған. Қазіргі уақытта іс сотқа жолданды.
