Ведомство мәліметінше, шаруа қожалығы мемлекеттен алуға тиіс субсидияның ұзақ уақыт бойы төленбеуіне байланысты заңды құқықтарының бұзылғанын айтып, департаментке шағымданған.
Өтініш негізінде жүргізілген жоспардан тыс тексеру барысында мемлекеттік қызмет көрсету тәртібінің сақталмағаны белгілі болды.
Атап айтқанда, өтініш берушіге субсидияның тек бір бөлігі ғана төленіп, қалған қаражат ұзақ уақыт бойы аударылмаған. Сонымен қатар төлемдердің заңда белгіленген кезектілігі сақталмай, кейін өтініш берген өзге шаруашылықтарға қаражат кезектен тыс берілгені анықталған.
Қолданыстағы заңнамаға сәйкес, мемлекеттік субсидиялар белгіленген кезек тәртібімен төленуі тиіс. Алайда Алматы облысының ауыл шаруашылығы басқармасы бұл талаптарды сақтамаған.
Белгілі болғандай, кәсіпкер субсидия алу үшін 2024 жылдың қазан айында өтініш берген.
Ал субсидия төлеуге қажетті қаржы 2025 жылдың ақпан айында бөлінгеніне қарамастан, жауапты орган тиісті төлемді жүргізбеген.
Соның салдарынан шаруа қожалығы бір жарым жыл бойы өзіне тиесілі мемлекеттік қолдаудан қағылып келген.
Тек уәкілетті органның араласуынан кейін ғана, 2026 жылдың ақпан айында шаруашылыққа 1 миллиард теңге көлеміндегі субсидия аударылып, кәсіпкердің құқығы ішінара қалпына келтірілді.
«Кәсіпкерлердің құқықтарын толық қалпына келтіру – басты міндет»
Қазақстан Республикасы Мемлекеттік қызмет істері агенттігінің Алматы облысы бойынша департаментінің бас маманы Сержан Атайбековтің айтуынша, мемлекеттік қызмет көрсету барысында заң талаптарының қатаң сақталуы – азаматтар мен кәсіпкерлердің құқықтарын қорғаудың басты кепілі.
«Мемлекеттік субсидияларды төлеу кезінде заңда белгіленген кезектілік пен рәсімдердің сақталуы міндетті. Жүргізілген тексеру нәтижесінде кәсіпкердің құқықтарының бұзылғаны анықталды. Уәкілетті органның араласуынан кейін шаруашылыққа 1 миллиард теңге көлеміндегі қаражат аударылды. Дегенмен департамент кәсіпкердің құқықтары толық қалпына келгенге дейін бұл мәселені бақылауда ұстайды», – деді Қазақстан Республикасы Мемлекеттік қызмет істері агенттігінің Алматы облысы бойынша департаментінің бас маманы Сержан Ерғалиұлы Атайбеков.
Департамент өкілдерінің мәліметінше, кәсіпкерлердің мемлекеттік қолдау шараларын уақытылы әрі заң талаптарына сәйкес алуын қамтамасыз ету бағытындағы бақылау жұмыстары алдағы уақытта да жалғасады.
