Күзгі науқан аясында әскерге шақыруды кейінге қалдыруға немесе одан босатылуға заңды негізі жоқ 18 бен 27 жас аралығындағы азаматтар әскери қызметке жіберіледі.
Жоспар бойынша Алматы облысынан шақырылатын жастардың мыңға жуығы Қорғаныс министрлігінің әскери бөлімдеріне аттанады. Ал 900-ден астам азамат Ұлттық ұлан, Мемлекеттік күзет қызметі және ҰҚК Шекара қызметінің қатарын толықтырады.
Өңірде әскерге шақыру жоспары бұған дейін де жоғары деңгейде орындалған. Мәселен, 2025 жылғы көктемгі науқанда жоспарланған 1742 адамның орнына 1763 азамат әскери қызметке жіберіліп, көрсеткіш 101,2 пайызға жеткен.
Әскерге шақырылушылардың денсаулығы цифрлық жүйе арқылы тексеріледі
Күзгі науқанның маңызды бағыттарының бірі – медициналық куәландыру үдерісін цифрландыру. Алматы облысында әскерге шақырылушыларды тексеру кезінде «Е-медосмотр» ақпараттық жүйесі қолданылады.
Жүйе азаматтардың денсаулығына қатысты мәліметтерді біріздендіріп, медициналық тексерудің қажетті кезеңдерінен өтуін бақылауға мүмкіндік береді. Бұл әсіресе азаматтың әскери қызметке жарамдылығы туралы шешім қабылдау кезінде маңызды.
Өңірде аталған жүйені енгізуге дайындық бұған дейін басталған. 2025 жылы медициналық тексерулерді ұйымдастыру үшін 11 медициналық және бір облыстық комиссия құрылған. Жұмысқа 109 дәрігер мен 46 орта буын медицина қызметкері тартылған.
Медициналық деректерді бірыңғай жүйеге көшіру әскерге шақырылушыларды тексеру барысын жүйелеуге және олардың денсаулық жағдайы туралы ақпаратты нақты есепке алуға мүмкіндік береді.
Әскери қызмет ЖОО-да тегін білім алуға жол ашуы мүмкін
Мерзімді әскери қызмет енді жастар үшін тек әскери міндетті орындаумен шектелмейді. Қызмет барысында жоғары нәтиже көрсеткен сарбаздарға жоғары білім алуға мүмкіндік беретін тетік те қарастырылған.
«Срочник 2.0» бағдарламасы аясында үздік әскери қызметшілер Қазақстанның жоғары оқу орындарында білім алуға арналған сертификаттарға ие бола алады. Сарбаздардың рейтингі мен жоғары оқу орындарына бөлінуі «Срочники 2.0» цифрлық платформасы арқылы автоматты түрде жүргізіледі. Сондай-ақ әскери қызметшілерге оқуға дайындалу үшін электронды кітапханаға қолжетімділік беріледі.
Бағдарламаның нәтижесі де бар. 2025 жылы Ұлттық ұланда мерзімді әскери қызмет атқарған 910 сарбаз Қазақстанның жоғары оқу орындарында тегін білім алуға сертификат алған. Ал бағдарламаға қатысуға 5,5 мыңнан астам мерзімді әскери қызметші өтінім берген.
Осылайша күзгі әскерге шақыру науқанында жастарды әскери бөлімдерге жөнелтумен қатар, олардың денсаулығын тексеруді цифрландыру мен қызметтен кейін білім алуына жағдай жасауға да басымдық беріліп отыр.
