І.Жансүгіров атындағы Мәдениет үйінде орналасқан ең ірі сайлау учаскісінде 07:00-ден бастап кісі қарасы үзілген жоқ. Жұрт әлі де келіп дауыс беріп жатыр. Сайлаушылардың белсенділігі жоғары. Бір ғана осы учаскеде 2453 адам тіркелген. Оның бірі қазақ өңіріндегі шығармашылығы жарқын тұлғалардың бірі – композитор, дирижер Әли Алпысбаев.
«Бүгін тарихи күн. Бұл Референдум халықтың сұранысымен жасалып жатыр. Басты құндылық – адам. Сол адамға қызмет жасап, әл-ауқатын жақсартуға, елдің көркеюіне жұмыс жасайды деп ойлаймын»,- деді композитор.
Учаскіде саяси науқанның әділ, әрі заң шеңберінде өтуін түрлі ұйымдардан келген байқаушылардың 7 сенімді өкілі мұқият қадағалап отыр.
Айта кетейік, облыста барлығы 1053 сайлау учаскесі болса, тіркелген дауыс берушілердің саны 1 млн 400 мыңға жуық. Таңмен таласа тұрған жұрт өз таңдауын жасап жатыр.
