«1989 жылы комбайн жүргіздім. Алқап басында бір үлкен тас техниканың жүруіне кедергі келтірді. Оны бәріміз жабылып алып тастайық дедік. Көзім бірден тастың формасына түсіп, қызығушылық тудырды. Тасты көтергенде оны ежелгі түркі мүсіні – балбал деп шамаладық. Сондықтан, оны далаға тастамай, үйге әкеліп қойдым. Енді міне, мұражай ашылғаннан кейін ол экспозицияның ортасынан ойып тұрып орын алды. Бұл – VII-VIII ғасырлардың жәдігері. Осындағы Көктөбе тауының төменгі етегінен табылған», — дейді Мұхарам Хайбуллин.
Биыл осы Лепсі ауылындағы тарихи мұражайға келушілердің саны артқан.
Өткен жылы меценаттардың көмегімен ашылған музейге қызығушылық танытатындар арасында жергілікті тұрғындар ғана емес, Германия, АҚШ, Ресей және ТМД елдерінен келетін туристер де көп. Жыл басынан бері мұнда 2 мыңға жуық саяхатшы келген.
Бүгінде Лепсі мұражайында 1 500-ге жуық түрлі экспонат тұр. Біздің дәуірімізге дейінгі V-III ғасырларда өсірілген көне дақылдар мен Түркі қағанаты дәуіріндегі балбал тас, 1949 жылғы патефонды да осы жерден көруге болады.
Лепсі өлкесі тарихи жәдігерлерге толы. Ауылдың ішінде, маңайында сақ қорғандары, балбал тастар көп кездеседі. Жақын жердегі жартастарға қашалған көне суреттер де табылған.
