Полиция мәліметінше, ер адамға қатысты қылмыстық іс қозғалып, ол Қарасай ауданының уақытша ұстау изоляторына қамалған. Іс материалдары сотқа жолданған.
Ведомство мәліметінше, бұған дейін өңірдің 29 жастағы тұрғыны танысына қатысты шара қолдану туралы арызбен жүгінген. Оның айтуынша, ер адам оның еркінен тыс мессенджерлер мен мобильді қосымшалар арқылы үздіксіз қудалап, жүйелі түрде хабарламалар жіберіп, психологиялық қысым көрсеткен.
Анель Амангалиеваның сөзінше, 24 ақпанда күйеуіне қатысты алғашқы сот отырысы өткен. Сот оны сталкинг ісі бойынша кінәлі деп танып, 25 тәулікке қамау жазасын тағайындаған. Сонымен қатар, ол жәбірленушілерге өтемақы қорына 5 АЕК төлеуге міндеттелген.
Блогер әлеуметтік желідегі парақшаларында алматылық кәсіпкермен әлі ресми некеде екенін, алайда оның ажырасуға мүмкіндік бермей жүргенін айтқан. Оның сөзінше, некеден кейін қорлау мен қысым басталған.
Анель қарым-қатынасты толық үзуді шешкен соң, қудалау күшейе түскенін мәлімдеді. Айтуынша, ер адам интимдік фото мен видеолар арқылы бопсалап, жалған аккаунттар ашып, оның таныстары мен клиенттеріне жазған. Кейін бұл парақшаларды өшіріп, жаңаларын ашып отырған.
