Бұл ауданда 28 мың гектардан астам суармалы жер бар. Су ол жаққа Іле өзенінен екі канал арқылы беріледі. Оның бірі – 15 мың гектар аумақты алып жатқан Тасмұрын магистралды желісі. Соңғы жылдары су көлемінің азаюына байланысты су қабылдағыш қондырғыға қосымша екі шлюз салу үшін жобалық-сметалық құжаты әзірленіп жатыр. Бұдан бөлек, мамандардың айтуынша, барлық суармалы жерді сумен қамту үшін суасты плотина салу қажет. Нәтижесінде судың көлемі 3,5 метрге көтеріледі. Өз кезегінде өңір басшысы жобаның қымбаттылығына қарамастан, бұл жоба аумақ үшін өте қажет екенін айтты.
Ауданға жұмыс сапары аясында Алматы облысының әкімі газ тарату станциясына да барды. Мамандардың айтуынша, жылыту маусымы басталғанға дейін өңірдің жиырма сегіз ауылының 10-н көгілдір отынға қосу жоспарланып отыр. Қалғандарына келетін болсақ, бұл елдімекендер екі жыл бойы кезең-кезеңімен газбен қамтамасыз етілетін болады.
Марат Сұлтанғазиев ауданы төрт мың шаршы метрді құрайтын оңалту орталығына да барды, онда он төрт адам жұмыс істейді. Кездесуде осы мекемені тиімді пайдалану жолдары талқыланды. Бүгінде мұнда ағымдағы жөндеу жұмыстары жүргізіліп жатыр. Болашақта қажетті мамандарды тарта отырып, орталықтың жұмысын күшейту, сондай-ақ төсек-орын санын жүз елуге дейін арттыру жоспарланып отыр.
Сондай-ақ облыс әкімі аудан орталығында орналасқан дене шынықтыру-сауықтыру кешенінің қызметімен танысты. Қазір онда бес жүзден астам балалар мен ересектер спортпен шұғылданады. Мұнда толыққанды спортпен шұғылдану үшін барлық қажетті жағдайлар жасалған.
Сонымен қатар Марат Сұлтанғазиев отыз жалдамалы үй салынып жатқан құрылыс алаңында болды. Бұл жобаны іске асыру өткен жылдың қыркүйегінде басталды, оны биылғы жылдың соңына дейін аяқтау жоспарланып отыр. Айта кету керек, үйлердің құрылысы мемлекеттік бюджет қаражаты есебінен жүріп жатыр, сомасы 759 миллион теңгені құрайды.
