«Еліміздегі құрылысы ұзаққа созылған нысанның бірі – Қарасай ауданындағы олимпиадалық дайындау базасы екені баршамызға мәлім. Биыл оның салынып жатқанына 19 жыл болды. Бұл жылдары не болғаны маған беймәлім. Десе де, осы мәселені көтеріп, Мемлекет және Үкімет басшыларының қолдауын алдық. Қаражат та бөлінді. Өзімнің жеке бақылауыма алдым. Комитет мүшелері де апта сайын барып, жұмысты қадағалап отыр. Нысан биыл қолданысқа беріледі деп нақты жоспарды құрдық», — деді министр.
Оның айтуынша, барлық құзырлы мемлекеттік мекемелер бірлесіп, жемқорлыққа жол берілмеуін бақылауға алған.
«Бұл – үлкен база. Мұндай нысан елімізде алғаш рет пайда болады. Жалпы көлемі 130 мың шаршы метрді құрайтын базада 23 олимпиадалық спорт түрінен дайындалатын алаңдар бар. Барлық Халықаралық стандарттарға сай салынып жатыр. Мұнда бір уақытта 2300 спортшы жаттыға алады. Сондай-ақ база жанынан 4 жұлдызды Қонақ үй де тұрғызып жатырмыз. Бұл – спортшылар үшін керемет мүмкіндік», — деді Асхат Оралов.
