Бұл шараның ұйымдастырылуына облыс әкімінің орынбасары Арслан Дандыбаев, «Kazakh invest» Ұлттық компаниясы, «Атамекен» Ұлттық кәсіпкерлер палатасы, «Астана» Халықаралық Қаржы Орталығы, және т.б. ірі компаниялар мұрындық болды.
Тренингке еліміздің 2 қаласындағы (Алматы, Шымкент) және 3 облысындағы (Алматы, Жамбыл, Түркістан) инвестиция тартуға тікелей қатысты ұйымдардың өкілдері қатысты.
Ауқымды оқыту процессі түрлі аймақтарға инвестиция тарту жолдарын әрі экономиканы ілгерілетудің кілтін таба білуді үйрету мақсатында ұйымдастырылды.
«Бүгінде облысты экономикалық тұрғыда дамытудың басым бағыттары айқындалды. Олар — ауыл шаруашылығы, логистика, баламалы энергия көздері, құрылыс материалдарын өндіру, туризм, фармацевтика және өңдеу өнеркәсібі», — деді Арслан Дандыбаев.
Оның айтуынша, елімізде ауыл шаруашылығы тауарларын өндірудегі Алматы облысының үлесі 9 пайыз. Өңірде 1000-нан астам өнеркәсіп жұмыс істейді. Оның ішінде 40 өнеркәсіп трансұлттық компания есебінде өз істерін өрге дөңгелетіп отыр.
«Алматы облысы — еліміздің инвестиция тартуға тиімді аймақтарының бірі. Соңғы үш жылда өңірге құйылған қаржы көлемі 13,5% артты. Нақ осы шақты айтар болсақ, облыста жалпы құны 971,1 млрд теңгені құрайтын 142 жоба жүзеге асқалы жатыр. Нәтижесінде 8800 жұмыс орны ашылмақ. 142 жобаның 12-сі шетелдік компаниялардың қолдауымен қолға алынады. Мұндағы инвестицияның құны — 320,2 млрд теңге, жұмыс орны — 2200», — деді өңір басшысының орынбасары.
Шеберлік сабағында инвестиция тартудың қыр-сыры түсіндіріліп, аталған қызметті мемлекеттік қолдау шаралары, инвестициялық омбудсмен шеңберінде жұмыс жүргізу, экономиканы дамыту секілді тақырыптарда дәріс оқылды.
