«2021 жылғы 30 желтоқсанда Мемлекет басшысы кәсіпкерлік қызмет саласында жаңа реттеуші саясатты енгізу мәселелері жөніндегі заңға қол қойды. Осыған байланысты, ҚР Ауыл шаруашылығы министрлігі «Атамекен» ҰКП, сарапшылар және мүдделі мемлекеттік органдармен бірлесіп, АӨК саласындағы қолданыстағы нормативтік құқықтық актілерге олардың жаңа базалық тәсілдерге сәйкестігі тұрғысынан талдау жүргізді», — делінген хабарламада.
Ресми ақпаратқа сүйенсек, талдау ветеринария, өсімдіктерді қорғау және карантин, тұқым шаруашылығы, астық нарығы, органикалық және ауыл шаруашылығы өнімдерін өңдеу, жер қатынастары және мал шаруашылығы бағыттары бойынша жүргізілді.
«Тексеру және бағалау қорытындысы бойынша ауыл шаруашылығы тауарын өндірушілерге қойылатын 170-ке жуық талаптың, оның ішінде өсімдіктерді қорғау және карантин жөніндегі 50 талаптың және ветеринария саласындағы 80 талаптың күшін жою және қайта қарау туралы шешім қабылданды», — деп жазды баспасөз қызметі.
Министрліктің мәліметінше, «Таза парақтан» реформасын іске асыру бизнес ортаны реттеудің тиімділігін арттыруға және ауыл шаруашылығы саласындағы кәсіпкерлікті жандандыру үшін қолайлы жағдайлар қалыптастыруға мүмкіндік береді. Бұл бағыттағы жұмыс жалғасып жатыр.
