«Үкімет балаларды қосымша біліммен қамтуды кеңейту бойынша жүйелі шаралар қабылдап жатыр. Осы жылдың соңына дейін 4-17 жас аралығындағы 3,6 млн баланы (балалардың 80%) секциялар мен үйірмелермен қамту жоспарланды. Мектеп үйірмелері мен мектептен тыс білім беру ұйымдарының қызметі шеңберінде спортпен және шығармашылықпен айналысуға 2,7 млн-ға жуық баланы (бүгінгі күні 2,4 млн бала) тарту көзделіп отыр», — деп жазды Ералы Тоғжанов депутаттық сауалға берген жауабында.
Оның айтуынша, бұл жұмысқа 70 мың педагог жұмылдырылған.
«Балалар мен жасөспірімдер спорт мектептерінде 387 мың бала жаттығады. Бұқаралық спортты дамыту мақсатында әрбір ауылда спорт нұсқаушылары лауазымы енгізілді. 2025 жылға қарай ауылдық жерлердегі нұсқаушылардың санын 3561-ге дейін жеткізу жоспарланды. Осылайша, спортпен айналысуға 500 мыңға жуық ауыл балаларын тарту көзделіп отыр», — деп түйіндеді Премьер-Министрдің орынбасары.
