«Биыл қалада 458 қылмыс тіркелген. Өткен жылдағы көрсеткіш 419 болған. Бұл 9,3% өсімді көрсетіп отыр. Оның ішінде Шеңгелді бойынша 34 қылмыс тіркелді. Нашақорлыққа байланысты 14 қылмыс орын алды», — деді Марат Сұлтанғазиев.
Өңір басшысының айтуынша, шаһарда қылмыс санының өскеніне қарамастан, оның 80,7%-ы ашылған.
Сондай-ақ әкім қалада бейнебақылау камераларының көбейіп жатқанына да назар аударды.
«Қонаевта 308 бейнебақылау камералары, жедел басқару орталығына шығатын 300 камера орнатылды. Барлығы штаттық режимде жұмыс жасап тұр. Бұдан бөлек, жол қозғалыс ережелерін бұзу фактілерін тіркеу үшін 7 жерде «Сергек» камералары қойылды. Нәтижесінде қала жолдарындағы өлім-жітім 40% төмендеді», — деді облыс әкімі.
Сөз соңында Марат Сұлтанғазиев құқық қорғау органдарының басшыларына Қонаевтағы қылмыс санын азайту бойынша жұмысты күшейтуді тапсырды.
Айта кетейік, облыс бойынша маңызды жолдарда, атап айтқанда, Алматы – Өскемен, Талдықорған – Алматы, Құлжа тасжолында «Сергек» интеллектуалды бейнебақылау жүйесі іске қосылды. Алматы облысындағы күре жолдардың бойында 124 орында 576 камера жұмыс істеп тұр.
